“Тоҕус томтор оонньууларын” кыайыылааҕынан Павел Друзьянов буолла

Сыллата Чурапчы улууһун биир кэтэһиилээх дьаһалынан «Тоҕус томтор оонньулара» буолар. Быйыл күүһү-уоҕу, тулууру, сымса буолууну эрэйэр күрэх «Өбүгэлэр оонньуулара» муҥуутуур кыайыылааҕа, Ханты-Мансийскайга ыытыллыбыт «Мистер Норд» күрэх анал аат хаһаайына, мас тардыһыытыгар өрөспүүбүлүкэ хас да төгүллээх чемпиона Степан Алексеев аатыгар ыытылынна.

VIIII төгүлүн ыытыллар күрэхтэһии икки күн буолла. Кылаабынай судьуйанан Россия Федерациятын бастакы категориялаах спортивнай судьуйа Семен Колодезников үлэлээтэ.

Күүстээхтэр күрэстэригэр Семен Аммосов (Чурапчы), Павел Друзьянов (Чурапчы), Алексей Ефимов (Муома), Давид Колесов (Мэҥэ Хаҥалас), Ньургун Лавров (Чурапчы), Архан Максимов (Таатта), Дмитрий Петров (Бүлүү), Мирхатим Рахматулин (Амма), Антон Тойтонов (Нам), Владимир Федоров (Ньурба) курдук дэгиттэр спортсменнар кытыннылар.

Спортсменнар бастакы күн «Боотур Уус» стадиоҥҥа түөрт көрүҥҥэ – бэрэмэдэй сүгэһэрдээх сүүрүүгэ, тутум эргииргэ, мас тардыһыыга уонна 400 миэтирэҕэ сүүрүүгэ күөн көрүстүлэр. Иккис күҥҥэ Маҕаайыыга күрэхтэһии түһүлгэтигэр үс төгүл үс ойууга, хапсаҕайга, оҕунан ытыыга, кулун тардыыга, бэрэбинэни көтөҕүүгэ кииристилэр.
Күрэхтэһии үөрүүлээх аһыллыытыгар Чурапчы улууһун баһылыга Степан Саргыдаев, Чурапчы нэһилиэгин баһылыга Владимир Сивцев, Степан Алексеев бииргэ төрөөбүт эдьиийэ Полина Алексеева эҕэрдэ тылы эттилэр.

Тыҥааһыннаах киирсии түмүгүнэн кыайыылааҕынан биир дойдулаахпыт Павел Друзьянов буолла уонна 500 тыһ.солк. уу харчынан наҕараадаланна. Иккис миэстэ буолары Ньурба улууһун бухатыыра Владимир Федоров ситистэ. 300 тыһ. солк. сууманан наҕараадаланна. Үһүс миэстэ Мэҥэ Хаҥаластан Давыд Колесов буолла уонна 150 тыһ. солк тутта. Оттон атын спортсменнар сыаналаах бириистэринэн наҕараадаланнылар.

Людмила Горохова, ааптар хаартыскаҕа түһэриитэ. Видео Наталья Сибирякова