Сылаҥ үөрэнээччилэрэ медицинэ билимин доктора Карл Георгиевич Башарин бириэмийэтин туттулар
Профессор Башариннар оскуоланы кытта үйэлээх ситимнэрин сиэннэрэ Георгий Карлович Башарин салгыыр. Кини “Мииринэй улууһа» МТ баһылыгын үп-харчы, экэниэмикэ хайысхатыгар солбуйааччынан үлэлиир. Георгий Карлович оҕо үөрэххэ тардыһыытын үрдэтэр, инники олоҕор сыалын -соругун чиҥэтэр сыаллаах уонна аҕатын, профессор, мэдицинэ билимин доктора Карл Георгиевич Башарин үтүө аатын үйэтитэн, сыл аайы икки бастыҥ үөрэнээччигэ бириэмийэ аныыр.
Бастакы, К.Г. Башарин аатынан бириэмийэ общественнай үлэҕэ көхтөөх, үөрэҕэр уонна тус бэйэтин сайдыытыгар үрдүк ситиһиилээх үөрэнээччигэ ананар. Быйылгы үөрэх сылын түмүгүнэн бу бириэмийэни 10 кылаас үөрэнээччитэ Валерия Макарова ылбыта. Валерия Бүтүн Арассыыйатааҕы “Молодые профессионалы” конкуруска ситиһиилээхтик кыттыбыта, салайааччыта — Е.Г. Макарова. Иккис, «БКЭ-ҕэ саамай үрдүк баалын иһин» бириэмийэни Дархан Посельскай нуучча тылын эксээмэнин түмүгүнэн ылла. Учуутала — Е. А. Яковлева.
Дьэ, бу курдук ситим быстыбат, салҕанар… Үөрэҕи-үлэни, науканы өрө тутан, дойдуларын, норуоттарын туһугар олорбут биир дойдулаахтарбыт үтүө ааттара кэнчээри ыччакка сирдиир сулус буолан, үйэлэргэ чаҕылыйдын.
Үлэнэн иитии бырайыага — Ил Дархан гранын кыайыылааҕа
Профессор Г.П.Башарин аатынан Сылаҥ орто оскуолатыгар быйыл сайын «Башаринцы» диэн ааттаах үлэ этэрээтэ тэриллибитэ. Манна оҕолор түргэнник ситэр кус оҕолорун уонна чоппуускалары көрөллөр-истэллэр. Этэрээт Ил Дархан гранын кыайбыт «Трудовой отряд подростков “Башаринцы”» бырайыак чэрчитинэн үлэлиир.
Онон кус-хаас атыылаһыыта, оҕолор хамнастара, араас оборудование –барыта грант нөҥүө хааччыллар. Грант үбүлээһининэн, от ыйын 20 күнүгэр, DEXP улахан морозильнай ларь ыллыбыт. Онтон көтөрдөр аһылыктарын, бииргэ үбүлээһин нөҥүө (софинансирование) нэһилиэк баһылыга Егор Макаров хааччыйар. Дьяконов Алеша, Коркина Айсена, Матвеева Эля, Трофимов Эдуард, Друзьянова Лиза, Макарова Дуня — олус эппиэттээх үлэҕэ кыһаллан-мүһэллэн үлэлии сылдьаллар. Үлэ хаамыытын, күннээҕи кыһалҕалары оскуола салалтата оҕолору бэйэлэрин кытта сүбэлэһэр, быһаарсар. Бары, улаханныын- кыралыын, үлэ ситиһиилээхтик түмүктэнэригэр баҕарабыт.
Лидия Сивцева, саха тылын уонна литэрэтиирэтин учуутала