Ахсыс кылааһы бүтэрдэҕин сыл Валерий ханнык идэни таларын мунаара, саарыы барбакка оҕо эрдэҕиттэн умсугуйар идэтин ылаары Одьулууннааҕы 13 нүөмэрдээх СПТУ-га киирбитэ.
Үөрэх сыллара биллибиккэ ааспыттара. Училище биир бастыҥ үөрэнээччитигэр, уопсастыбанньыгар суоппар буолбутун туоһулуур быраабы туттарар хамыыһыйа кини кыһамньытын, үчүгэй бэрээдэктээҕин астынан бэлиэтээбитэ. Тиэхэньикэни ыытар быраабын ылбыта. Онтон Ийэ дойдутугар сулууспалааһын. Сэбиэскэ аармыйаҕа сулууспалыыр сылларыгар гвардейскай мотострелковай полк бойобуой массыынатын уруулугар олорбута. Бэйэтин ытык иэһин толорон кэлээт да, төрөөбүт-үөскээбит дойдутугар, Субуруускай аатынан сопхуоска, суоппарынан үлэлээбитэ.
Итиннэ, пятилетка быһаарыылаах сылыгар, кини алта ый суоппардаабыта. Бу кылгас кэмҥэ да тиэхэньикэҕэ олус кичэллик сыһыаннаһарын, ханна да сырыттар үчүгэй бэрээдэктээҕин, тиэрдиллибит сорудаҕы толорууга дьулуурдааҕын уонна сырыыны-айаны тулуйарын көрдөрбүтэ. Эдэр суоппар Барашков итинник сыл аҥара үлэлээн 70 тыһыынча туонна-биэрэстэни сүүрдүбүтэ.
Тутаах сылга “ГАЗ-53” массыынанан үгүс рейстэргэ сырыппыта. Аҥардас Кытаанах отделениетын фермаларыгар, тутууларыгар, араас тэрилтэлэригэр эрэ буолбакка, сопхуоһун атын отделениеларыгар эмиэ бэрт элбэх таһаҕаһы таспыта. Ыраах Уус-Миилтэн пириэстэммит оту фермаларга аҕалыыга үгүстүк айан суолун туппута. Оттон Бэстээҕинэн, Дьокуускайынан хаста сылдьыбытын ааҕан сиппэккин.
Комсомолец Валерий Барашков пятилетка төрдүс, тутаах сылыгар “ГАЗ-53” массыынанан 149645 туонна-биэрэстэни оҥорбута. Онон, итинник мааркалаах массыыналарга саамай үрдүк көрдөрүүнү ситиһэн, 1974 сылга ОРОЙУОН ЧӨМПҮЙҮӨН-СУОППАРЫН лиэнтэтин кэтэр чиэскэ тиксибитэ.
Бэлэмнээтэ Сэмэн Жендринскэй