Чурапчыга XXV Өрөспүүбүлүкэтээҕи «Снежный барс» байыаннай — спортивнай оонньуу ыытыллар. Эдэр көлүөнэни дойду патриота буола иитэргэ, эт-хаан уонна өй-санаа өттүнэн сайыннарар сыаллаах күрэх 2000 сылтан ыытыллар. Күрэхтэһиигэ бэйэлэрин улуустарыгар бастаабыт байыаннай-патриотическай кулууптар, юнармейскай этэрээттэр хамаандалара кытталлар. Ол курдук бүгүн С.А. Новгородов аатынан Чурапчы орто оскуолатыгар Сахабыт сирин 11 улууһуттан: Анабаартан, Амматтан, Үөһээ Бүлүүттэн, Горнайтан, Мэҥэ- Хаҥаластан, Намтан, Муоматтан, Өймөкөөнтөн, Уус – Алдантан, Уус-Майаттан, Тааттаттан хамаандалар кэллилэр.
Кыттааччылары С.А Новгородов уонна И. М. Павлов аатынан Чурапчы орто оскуолаларын , Д. П. Коркин аатынан Чурапчытаа5ы республиканскай спортивнай олимпийскай эрэллэри бэлэмниир орто оскуола-интернат уонна С. К. Макаров аатынан Чурапчы гимназиятын волонтер оҕолоро үөрэ-көтө көрсөн, регистрацияны ааһалларыгар, түһэр сирдэрин булалларыгар күүс-көмө буолаллар.
Бүгүн хамаандалар мандатнай комиссияны ааһыахтара, Чурапчы музейдарыгар сылдьыахтара, «Хорсун санааланыы» урогар кыттыыны ылыахтара.
И. М. Павлов аатынан Чурапчы орто оскуолатын медиа кулууп оҕолоро