Саас кэлэн, айылҕа тыллан, дьон-сэргэ айылҕаҕа тардыһара күүһүрэр, сынньана, шашлыктыы тахсара элбиир. СӨ Ыксаллаах быһыы-майгы сулууспата олохтоохторго хайдах сөптөөхтүк шашлыктыахха сөбүгэр сүбэлэрин биэрэллэр.
Тиэргэҥҥэ шашлыктыыр буоллаххытына, мангалы дьиэттэн уонна хаһаайыстыбаннай тутуулартан тэйиччи, туһааннаах сиргэ туруорар тоҕоостоох. Мангалга уоту оттон баран, көрүүтэ суох хаалларар уонна уот оттуутун оҕолорго эрэнэр сатаммат. Уот кыыма тыалтан ыраахха диэри көтөн, баһаары таһаарыан сөп.
Айылҕаҕа үксүгэр туох көстөрүнэн шашлыгы буһараллар. Онуоха бэйэни кытта чоҕу уонна мангалы илдьэ сылдьар ордук. Мангалы, грили туһамматахха, уоту ыытар куттал тахсар. Сынньана сылдьан, баһаар барбытын билбэккэ да хаалыахха, хойутаан көрүөххэ сөп. Оттон мангалга умайбыт уоту киһи хонтуруоллуур. Костеру да, мангалы да намыһах мас үүнэр сиригэр оттумаҥ.
Түргэнник умайар уонна убаҕас уматыгы туттумаҥ: испиискэнэн уматар түгэҥҥэ бэйэҕитин сиэтиэххитин сөп. Оттон мангалга дуу, костерга дуу кыра да уот кыыма баар буоллаҕына, уматыктаах бытыылка эһиги илиигитигэр умайан тахсыан сөп.
Дьокуускай куорат территориятыгар нэһилиэнньэ маассабай сынньанар сирдэринэн буолаллар:
- Хаҥалас микрооройуона. Чоҕу сүөкүүр причал кэннигэр. Хаҥалас мырааныгар баар беседка.
- Хатас нэһилиэгэ. Покровскай тракт 20 км, уҥа өттө.
Бу сирдэргэ хаһан баҕарар сылдьыахха сөп, ол эрээри костеру уматар көҥүллэммэт. Шашлыгы чоххо буһарар туһааннаах миэстэлэр бааллар.
“Биһиги Чурапчыбытыгар маннык көҥүллээх сир суох, ханна да көҥүллэммэт”, — диэн улуустааҕы ЕДДС иһитиннэрэр.
Баһаартан сэрэхтээх буолуу быраабылатын кэспиттэргэ РФ КоАП 20.4 ст. 1 чааһынан административнай ыстараап олохтонор.
Ханнык баҕарар баһаартан сэрэхтээх буолар ордук.
Елена Макаринская
