Саха Өрөспүүбүлүкэтин Бырабыыталыстыбатын 2023 сыллааҕы үлэтин отчуота бүгүн Чурапчы улууһугар үс хайысханан саҕаланна. Тыа хаһаайыстыбатын уонна ас-үөл бэлиитикэтин миниистирин солбуйааччы Николай Афанасьев салайар иккис бөлөҕө отчуоту Бахсы нэһилиэгиттэн саҕалаата. Өрөспүүбүлүкэ ситэриилээх былааһын бэрэстэбиитэллэрин Чурапчы улууһун баһылыгын бастакы солбуйааччыта Егор Сивцев арыаллаата.
Николай Степанович өрөспүүбүлүкэҕэ ыытыллыбыт үлэ сүрүн өрүттэригэр тохтоон, сиһилии дакылааты оҥордо.
Дакылаат кэннэ Бахсы нэһилиэгин олохтоохторо байыаннай дьайыы кыттыылаахтарын дьиэ кэргэттэригэр көрүллэр көмө, оҕо босуобуйатын көрүллүүтүн, оскуола оҕолорун биир кэлим уонна сүрүн судаарыстыбаннай эксээмэннэрин миэстэтигэр нэһилиэккэ ыытыллыытын, эдэр ыччаты тыа сиригэр олохсутарга саҥа бырагыраама оҥоһуутун о.д.а боппуруостары туоһуластылар.
Олохтоохтор сытыы боппуруоһунан Чыаппара-Бахсы суолун оҥоһуутун туруордулар. Маны сэргэ үгүс ыйытык тыа хаһаайыстыбатын салаатын өттүгэр киирдэ. Ол курдук ыанньык сүөһүгэ көрүллэр субсидия, сылгы мэччирэҥин, уматык сыанатын, үүт харчыта сыл саҥата тоҕо хойутаан кэлэрин сурастылар. Ону таһынан доруобуйа харыстабылыгар, үөрэхтээһиҥҥэ кэккэ ыйытыылар киирэн хоруйданнылар.
Мунньахха уопсайа 43-с нэһилиэк олохтооҕо кыттан, СӨ Бырабыыталыстыбатын үлэтин сөптөөҕүнэн сыаналаатылар.
Людмила Горохова