СӨ Бырабыыталыстыбатын бэрэссэдээтэлэ Кирилл Бычков: “Чурапчы балыыһатын тутуута бүгүҥҥүттэн күн аайы хонтуруолланыаҕа”

Бүгүн, ахсынньы 16 күнүгэр, СӨ Бырабыыталыстыбатын бэрэссэдээтэлэ Кирилл Бычков, Чурапчы улууһугар кэлэн үлэлээтэ. Кини сүрүннээн Прокопий Сокольников аатынан Чурапчытааҕы киин балыыһа иккис уочараттаах тутуутун хаамыытын сирийэн көрдө, үөрэттэ.

Өрөспүүбүлүкэ спикерын кытары СӨ тутууга миниистирэ Виктор Романов, СӨ доруобуйа харыстабылын миниистирэ Лена Афанасьева, Чурапчы улууһун бастакы солбуйааччы Егор Сивцев, Чурапчы нэһилиэгин баһылыга Владимир Сивцев, СӨ СГЗ тыа сиригэр тутуллар эбийиэктэр генеральнай дириэктэрин солбуйааччы Владимир Жирков, “Агдезия” ХЭТ генеральнай дириэктэрэ Ариан Габышев, “СибТрансСиб” ХЭТ генеральнай дириэктэрэ Владислав Петров эбийиэктэр тутууларын көрдүлэр.

“Бүгүн Чурапчы нэһилиэгэр икки эбийиэккэ сырыттыбыт ол эрэн сүрүн болҕомтобутун биллэн туран балыыһа тутуутугар уурабыт. Бу күннэргэ балыыһа тутуутугар үлэһит киһи ахсаанын элбэтиигэ, тэтими түргэтэтиигэ итиэннэ кэлиэхтээх матырыйааллары тиэрдиигэ сорудахтаатыбыт. Сылбыт түмүктэнэрэ икки эрэ нэдиэлэ хаалла, хомойуох иһин эбийиэк кэлэр эрэ сылга үлэҕэ киирэр буолла. Эрдэ этиллибитин курдук тутуу нацбырайыак чэрчитинэн ыытыллар. Үлэ туох баар салааларын өссө төгүл күүһүрдүөххэ наада, төһө даҕаны улахан аҥара бүппүтүн иһин, инженерия ону таһынан оборудованиелары установкалааһыҥҥа дьон ахсаана тиийбэт. Бу күннэргэ манна үлэни хонтуруоллуурга өрөспүүбүлүкэттэн куратор ананан кэлиэҕэ, онон хаалбыт икки нэдиэлэҕэ улахан хамсааһыннары күүтэбит. Мантан инньэ күн аайы толоруллубут үлэни отчуоттатар буолуохпут, үлэ чааһын бүтүүтэ туох хамсааһын буолбутун хаартыскаҕа түһэрэн тутуу министиэристибэтигэр ыытыахтара. Этиллибитин курдук дьон олоҕор-дьаһаҕар анаан бу эбийиэк тутуллуута олус улахан суолталаах онон сүрүн болҕомтобут манна буолуоҕа”, — диэн СӨ Бырабыыталыстыба бэрэссэдээтэлэ Кирилл Евгеньевич бэлиэтээтэ.

 

Сэмэн Жендринскэй. Ааптар хаартыскаҕа түһэриитэ