Быйыл, Арассыыйа уонна СӨ норуодунай худуоһунньуга, профессор Афанасий Мунхалов төрөөбүтэ 90 сылын, Чурапчы улууһугар араас таһымнаах дьаһаллар ыытыллан бара тураллар.

Бүгүҥҥүттэн, Чурапчы нэһилиэгин килбэйэр киинигэр, эбэ сүрүн салаатыгар Афанасий Петрович биир аатырбыт “Слушают мир” 1965 сыллааҕы үлэтин хаарга уруһуйдааһын үлэтэ саҕаланна. Онон сарсын улууспут олохтоохторо биир кэмҥэ, улахан үлэ түһүмүгүн көрүөхтэрэ.

“Бүгүн бэлэмнэнии үлэтин улуустааҕы култуура үлэһиттэрэ саҕалаабыттара, сүрүн салайааччыларынан “Айылгы” НАДь-тин худуоһунньуга Сергей Федоров уонна Иван Кандинскай аатынан “Айыллаан” КК худуоһунньуга Ирина Васильева буолаллар. Кинилэри кытары оройуоннааҕы “Үөрүү” оҕо дьоҕурун эбии сайыннарар киин уһуйааччылара Адександра Игнатьева, Аина Татаринова, Андрей Гоголев аатынан оҕо ускуустубатын оскуолатын педагогтара Прокопий Екечьямов, Екатерина Захарова, Прасковья Борисова аатынан “Улыбка” оҕону сайыннарар киин-уһуйаан иитээччитэ Алена Захарова кыттыһаннар оҥорсуохтаахтар. Кинилэри сэргэ сарсыҥҥы үлэтигэр 20-кэ ойуулуур-дьүһүннүүр ускуустуба куруһуогун иитиллээччилэрэ кэлэн кытталлара күүтүллэр. Улахан үлэ силигин ситэн түмүктэннэҕинэ, улууспут дьонугар-сэргэтигэр, ыччаттарга умнуллубат үтүө өйдөбүлү, биир дойдулаахпыт аата үйэлэргэ ааттана турарыгар төһүү күүс буолуоҕа”, —  диэн оройуоннааҕы “Айылгы” НАДь-тин дириэктэрэ Розалия Ивановна Игнатьева кэпсээтэ.

 

Сэмэн ЖЕНДРИНСКЭЙ