Саха Өрөспүүбүлүкэтэ төрүттэммит күнэ аан дойду хайа баҕарар муннугар олорор сахаҕа олус суолталааҕын муус устар 28 күнүгэр Санкт-Петербург куоракка ыытыллыбыт тэрээһин толору туоһулаата.
Бу куорат госпиталларыгар элбэх саха байыаһа бааһырыыттан эмтэнэр. Анал байыаннай дьайыы хара саҕаланыаҕыттан “Саха-Петербург волонтердара” диэн уопсастыбаннай хамсааһын саҕаланан, саха далбар хотуттара госпитальга сытар уолаттары ийэлии көрөн-харайан, Саха сириттэн тиийбит бородууктаттан астаан-үөллээн, байыастар туруктарын бөҕөргөтөллөр. Бу түмсүүгэ Болтоҥоттон төрүттээх биир дойдулаахпыт, “Кыым” хаһыат суруналыыһа Оксана Жиркова сырдатыы өттүгэр үлэлэһэр. Биир мунньахха “Оннооҕор Ленинград блокадатын кэмигэр симфоническай муусука тыаһаабыта. Дьоҥҥо-сэргэҕэ култуурунай сынньалаҥ диэн хайа да кэмҥэ суолталаах. Уустук кэмҥэбары бииргэ буолуоҕуҥ, санаабытын көтөҕүөҕүҥ, сахалыы кэнсиэртэ тэрийиэҕиҥ” диэн икки ый анараа өттүгэр этии көтөҕөн, Арассыыйа Бэрэсидьиэнин иһинээҕи Саха сиринээҕи Бастайааннай бэрэстэбиитэлистибэ, волонтердар өйөөннөр, Санкт-Петербург Выборгскай оройуонун салалтата “ФОРПОСТ” диэн ыччат киинин туран биэрэн, хамсааһын саҕаламмыт.
Биллэрин курдук,ити оройуону кытта биһиги улууспут уруккуттан доҕордуу ситими тутар.Выборгскай оройуон сиригэр сахалартан бастакы лингвист-учуонайбыт Семен Андреевич Новгородов искибиэрэ тутуллубута. Сотору кэминэн пааматынньыга туруоруллуохтаах. Ону таһынан оройуон Сампсониевский саадын пааркатыгар Питер сахаларын ыһыаҕаыытыллар. Быйылгы тэрээһин от ыйыгар былааннанар. Өрөспүүбүлүкэ күнүн тэрээһинигэр оройуон баһылыга Виктор Михайлович Полунин бэйэтинэн кыттыыны ылбыт.
“Питерга 5000-тан тахса саха олороро биллэр. Олортон туоһулаһан, биирдиилээн толорооччулары, ансаамбыллары булаталаатыбыт. “Сайдыы” диэн ыччат түмсүүтэ улахан күүс-көмө буолла. Түмсүү иһинэн тэриллибит “Талбан” норуот үҥкүүтүн ансаамбыла, Герцен аатынан педагогическай университет иһинээҕи “Северное сияние” тыйаатыр-устуудьуйа сүрүн тирэх буоллулар. Ону тэҥэ биирдиилээн толорооччулар, уруулуу омуктар диаспораларын ансаамбыллара кыттыһан, 21 нүөмэрдээх толору кэнсиэр таҕыста. Кэнсиэр иннинэ волонтерскай хамсааһын күүһүнэн сахалыы быыстапка тэрилиннэ. Дьон бэйэлэрин оҥоһуктарын, саха култууратын көрдөрөр эспэнээттэри аҕалан туруордулар. Соһуйуохпут иһин, 356 миэстэлээх “ФОРПОСТ” ыччат киинигэр тобус-толору көрөөччү муһунна.. Саамай сүрүнэ, госпиталларга сытар биир дойдулаахтарбыт кыттыыны ыллылар. Кинилэри сэргэхситии, санааларын көтөҕүү сүрүн сыалбыт этэ”, — диэтэ Оксана Васильевна.
Хомустан саҕалаан, опернай, сахалыы, хотугулуу ырыаҕа, үҥкүүгэ, уруулуу калмык, бүрээт үҥкүүтүгэр, тыва хабарҕатын ырыатыгар тиийэ уус-уран самодеятельность жанрдарынан таҥыллыбыт кэнсиэр ытыс тыаһынан доҕуһуолланна. Түмүккэ дьон бары оһуохайгатурдулар. Улахан сааланы, сыананы тилэри илии-илииттэн ылсыбыт дьон биир тэҥ хамсаныыта ураты туругу иҥэрдэ. Кэнсиэргэ Саха сирин кытта ситимнээх дьон эрэ буолбакка, атын диаспоралартан, Выборгскай оройуонтан элбэх киһи сырытта. Дьон саха култууратын, ырыатын-тойугун сэҥээрбиттэрин кистээбэтилэр, хойукка диэри тарҕаспакка, кэпсэттилэр.
“Дойдутуттан ыраата барбыт киһини олохтоох омук эйгэтигэр суураллар, сахатын умнар курдук өйдөбүл баар буолааччы. Бэйэм илэ харахпынан көрөн, Питерга олохсуйан олорор дьону кытта алтыһан, “саха – ханна баҕарар саха”диэн этиини бигэргэтиэм этэ. Саха дьоно ханна баҕарар тылларын умнубаттар, култуураларын сүтэрбэттэр. Ону биһиги тэрээһиммит да туоһулаата. Дьон үөрбүт, дьолломмут сирэйин көрүө этигит! Онтон сүргэлэрэ көтөҕүллэн, ыһыахха өссө элбэх киһи кэлиэ диэн эрэнэбин”, — диир биир дойдулаахпыт.
Сэмэн Жендринскэй. Хаартыскалар Оксана Жиркова тус архыыбыттан.