Саха норуодунай суруйааччыта Егор Неймохов, өссө 1983 сыллаахха суруйбут “Хапсыһыы” сэһэнэ билиҥҥээҥи диэри интэриэһин сүтэрбэт. Дьон-сэргэ успуорду, чуолаан саханы — Саха дэппит көҥүл тустууга умсугуйарын тухары бу кинигэ хат-хат бэчээттэнэн тахса туруоҕа.
Онтон 2023 сыл муус устар 6 күнүгэр, биир дойдулаахпыт, Саха сириттэн бастакынан Сэбиэскэй Сойуус чөмпүйүөнэ Вячеслав Карпов төрөөбүт күнүгэр, кини уустук олоҕун кэпсиир “Хапсыһыы” киинэ трейлерин ютуб ханаалга көрдөрөн билиһиннэрбиттэрин тустуу фанааттара улаханнык биһирээбиттэрэ. Бу олоххо чахчы буолбут түгэннэртэн…
Киинэ бэйэтэ, олунньу 22 күнүгэр өрөспүүбүлүкэ бары киинэ тыйаатырдарыгар көстөрө былааннанар. “Билиҥҥи туругунан бу бастыҥ киинэ хартыыната, — диэн режиссер итиэннэ сүрүн оруолу толорооччу Эр Санаа Ох-Хотор кэпсиир. – Барыта олоххо баар көстүү. Быһа көтөн эттэххэ, бу хартыына Аан дойдуга биллэр тириэньэр Дмитрий Коркин иитиллээччитэ, Улуу ыспарсымыан Вячеслав Карпов олоҕун туһунан буолар. Талааннаах киһи бэйэтин ыспартыыбынай карьератыгар төһө даҕаны уустуктары көрүстэр, бүдүрүйдэр — өйүн-санаатын түмэн, олох көнө суолугар үктэнэн, успуорка төннүүтүн көрдөрөр. Бу киинэ биллэн туран үүнэн иһэр ыччаттарга итиэннэ ыспарсымыаннарга барыларыгар иитэр-үөрэтэр суолтата олус улахан”. Хартыыналары Уус Алдаҥҥа, Дьокуускайга уонна Москуба куоракка уһуллулар.
Киинэни Sinet Spark уонна IRON COLLECTION өйөбүллэринэн “Санаа синема” хампаанньа уһулла. Бу хартыынаҕа өссө Кэрэчээнэ Туприна дебютуур.
Кинигэттэн быһа тардыы:
Кыһын Наташа каникулугар кэлэн барыаҕыттан аны киниттэн “Догорову Анатолию Александровичу” диэн ааттаан күндү да суруктар кэлэр буолбуттара.
Форматыгар киирэн эрэр тустуук оройуон хамаандатыгар киирэн баран, кыыһын үөрэҕин бүтэрбитинэн эҕэрдэлээбитэ. Наташаны аспирантураҕа хаалларбыттар. Кыыс биир ый сынньана кэлиэҕиттэн күн аайы “Спартак” стадиоҥҥа кэлэн, киин трибуна анныттан тустууну көрөр.
Сарсын тиһэх тустуу. Степанов кыахтаах уол. Бу сырыыга эдэр киһи очконан хотто. Толя Гришаҕа хотторуутун хомолтотун эппитигэр, доҕоро:”Эн саамай сүрүн хапсыһыыга, олоххо хотон спортка эргилинниҥ. Онтон атын улахан кыайыы баар буолуон сатаммат!” – диэбитэ.
Үтүөкэн да күннэр үүннүлэр ээ, доҕоттор!
Киинэни устар хамаанда улахан үлэни ыытта: артыыстары уобарастарынан талан ылыы, Дмитрий Коркин үөрэтэр ньыматын, албастарын үөрэтии, тустуу снарядтарын саҥаттан тутуу, көһө сылдьан хас даҕаны сиргэ уһулуу о.д.а. Онон кэлэр ыйга улахан премьераны күүтэбит.
Сэмэн Жендринскэй. Постер ааптара Николай Мочкин.