РФ Суруйааччыларын сойууһун чилиэнэ, СР Культуратын үтүөлээх үлэһитэ, СР Тыа хаһаайыстыбатын салаатыгар уонна А.Е.Кулаковскай аатынан Государственнай бириэмийэтин лауреата, саха норуодунай суруйааччыта, Чурапчы улууһун уонна Одьулуун нэһилиэгин Бочуоттаах гражданина, биир дойдулаахпыт Василий Назарович Егоров-Тумарча олоҕун, айар үлэтин кэнчээри ыччакка сырдатар уонна иитэр-үөрэтэр сыаллаах үгэскэ кубулуйбут тэрээһиҥҥэ 4-8, 10 кылаас оҕолоро кыттыыны ыллылар.
Анаан киэргэтиллибит аактабай саала сыанатыгар оскуола библиотекара А.Г.Абрамова В.Н. Егоров-Тумарча “Одьулууннар” кинигэтиттэн инсценировкалары оҕолор, кэлбит ыалдьыттар сөбүлээн көрдүлэр. Ис хоһоонунан кистэлэҥнээх ыйытыктар бэриллэн, туспа сэҥээриини ылла. Ол кэнниттэн “Библионочь с Тумарча” буолла. Социальнай партнердарбыт: “Иэйэхсит” түмсүүттэн А.Е.Барашкова, Е.Е.Окорокова, «Дархан” аҕа түмсүүтүттэн Р.Н.Карпов бэйэлэрин маастар-кылаастарын көрдөрдүлэр. Салгыы минньигэс астаах библиокафе аанын тэлэччи аста, үөрэнээччилэри күндүлээтэ. Квест-оонньууга саҥа күүһүнэн үөрэ-көтө күрэстэһии саҕаланна. Манна аҕыс станциянан оҕолор төрөөбүт дойду историятыгар, биллиилээх дьонугар, сиригэр билиилэрин, сатабылларын, мындырдарын тургутан көрдүлэр. Олохтоох модельнай библиотека сэбиэдиссэйэ Т.П.Григорьева, учууталлар уонна педагогтар бэрт интэриэһинэй, оҕону сэҥээрдэр станциялары үлэлэттилэр. Тэрээһини оонньуулардаах библиодискотека түмүктээтэ.
Маны таһынан кэтэхтэн күрэххэ оҕолор сорудахтары толоруохтара:
-Алын сүһүөх кылаастар Тумарча айымньыларынан араас матырыйаалтан оҥоһуктары оҥоруу;
— Тумарча айымньыларынан тылбаас күрэҕэ (сахалыы-нууччалыы, сахалыы-английскайдыы).
Түмүк ыам ыйын 15 күнүгэр, Аан дойдутааҕы дьиэ кэргэн күнүгэр биллиэҕэ, кыайыылаахтар бэлиэтэниэхтэрэ. Эһиилги үөрэх дьылыгар ыытыллар В.Н. Егоров-Тумарча олоҕор, айар үлэтигэр аналлаах улуустааҕы научнай-практическай конференцияҕа бэлэмнэнэн, чинчийэр үлэни ыытыы кылаастарга сайыҥҥы сорудах буолла.
Санатан эттэххэ, Василий Назарович Егоров-Тумарча оҕолоро, чугас аймахтара география уонна саха тылыгар, литературатыгар ситиһиилээх выпускникка стипендия анаабыттара. Бу курдук, “Тумарчалыын биир күн” үрдүк таһымнаахтык ааста. Оҕолор үөрэн-көтөн, элбэҕи билэн-көрөн тарҕастылар.
А.Н.Неустроева, саха тылын учуутала