Саҥа төрүөҕү иитии дьыалата эрэллээх илиигэ туттарылыннаҕына, ньирэй сааһы этэҥҥэ туоруур. Күөххэ үктэнэн баран көрөөччү кыһамньытынан эбии төлөһүйэр. Оччоҕуна үчүгэй туруктаах бороон буолан кыстыгы булар.
Аммос Винокуров ньирэйи бүөбэйдээһиҥҥэ идэтийбит, уопуттаах сүөсүһүт быһыытынан биллэрэ. Кини, хас биирдии ньирэйин сааһыттан уонна туругуттан сылыктаан, тус-туспа бөлөхтөөн көрөрө. Аһатыы эрэсиимин бастакы күннэриттэн кытаанахтык тутуһара. Үлэтигэр зооветеринарнай исписэлиистэн сүбэлэрин, ыйыыларын халбаҥнаабакка олохтуура уонна бастыҥ уопуту саталлаахтык туһанара.
1973 сылга Бүтүн Сойуустааҕы социалистическай куоталаһыыга киирсэн, олус үчүгэй көрдөрүүнү ситиспитэ: 81 ньирэйдэрин барыларын тыыннаах иитэн сопхуоһугар туттарбыта, оройуон чөмпүйүөн ньирэй көрөөччүтүнэн буолбута.
Тохсус пятилетка төрдүс, тутаах сылыгар эмиэ итиччэ ахсааннаах саҥа төрүөҕү илиитигэр туппута. Биири да энчирэппэккэ ииппитэ уонна кинилэр сууккаҕа ортотунан 652 грамм төлөһүйэллэрин ситиспитэ, сезон устата хас биирдиилэрин тыыннаах ыйааһынын 117 киилэ 350 грамм улаатыннартаабыта. Онон иккис төгүлүн ОРОЙУОН ЧӨМПҮЙҮӨН НЬИРЭЙИ КӨРӨӨЧЧҮТҮН аалай лиэнтэтин кэтэр чиэскэ тиксибитэ.
Аммос Алексеевич Субуруускай аатынан сопхуос Хатылытааҕы отделениетыгар өр сылларга бороон көрөөччүлэр звеноларын салайбыта. Звено биэс чилиэнэ 160-нуу бороонноох этилэрэ. Кинилэр Улуу Кыайыы 30 сылын туолар кэрэ-бэлиэ күнүн көрсө көхтөөх социалистическай куоталаһыыга киирсэн үлэлээбиттэрэ. Пятилетка түмүктээһиннээх сылын кыстыгар хас биирдии бороон ортотунан 100-түү киилэҕэ тиийэ улаатыннарар соруктарын эрэллээхтик толорбуттара.
Бэлэмнээтэ Сэмэн Жендринскэй