Амма орто оскуолатын үөрэнээччилэригэр уонна үлэһиттэригэр икки күннээх күргүөмнээх субуотунньук буолан ааста. Быйыл үүнүү олус учугэй буолан үөртэ. Халлаан да туран биэрдэ. Ол түмүгэр 140 куул хортуоппуй уонна хаппыыста өлгөм үүнүүтүн 2 га сиртэн ыллыбыт. Манна илиилэрин араарбакка элбэх сыллар тухары сыраларын ууран үлэлии сылдьар дьоммутун педагог- агроном Елена Диодорованы уонна бу кэнники сылларга Николай Захаровы ордук чорботон бэлиэтиэхпитин баҕарабыт.
Үөрэнээччилэр санааларын маннык эттилэр:
Иннокентьев Самсон, 11-с кылаас.
Биһиги оскуолаҕа үгэс буолбут улахан тэрээһиммит буолан ааста. Бүтүн оскуоланан Кыстык-Кугдаҕа тиийэн хортуоска уонна хаппыыста хомууругар сырыттыбыт. Мин көрөрбүнэн, быйылгы дьылга оҕуруот аһын үүнүүтэ олус үчүгэй буолбут, сарсыардаттан саҕалаан эбиэккэ диэри хортуоска хомуура этэҥҥэ түмүктэммитэ, инньэ гынан 90-тан тахса куул хортуосканы ылары ситистибит.
Тоскина Ванесса, 11-с кылаас.
Бэҕэһээ, ол эбэтэр балаҕан ыйын 21 күнүгэр, Амма орто оскуолатын орто-улахан сүһүөх оҕолоро уонна учуталлар буолан үүннэрбит хортуоскабытын бары күүстээхтик түһүнэн эбиэккэ дылы хостоон бүтэрбиппит. Хортуоскабыт үүнүүтэ олус үчүгэй, элбэх куул хомулунна,
Онтон аһаан, сынньанан, күүс-сэниэ эбинэн хаппыыстабыт сиригэр барбыппыт. Сибиэһэй салгыҥҥа бэрт таһаарыылахтык үлэлээбиппит.
Ильина Вера, 11-с кылаас.
Биһиги Амма орто оскуолата хортуоппуй уонна хаппыыста хомуйуутугар сылдьан кэллибит. Быйылгы сылга оҕуруот аһа санаабытыгар быдан улахан уонна элбэх. Күһүҥҥү күн былырыыҥҥытааҕар сылааһынан угуттаата.
Евсеева Вика, Игнатьева Настя, 8-с кылаас.
Бары бииргэ көхтөөхтүк үлэлээтибит, повардарбыт онно миэстэтигэр тиийэн сылаас минньигэс аһынан күндүлээтилэр. Иккис күн бары үлэ тугун- ханныгын билэммит түргэн баҕайытык түмүктэммитэ. Бу аныгы үйэҕэ техника элбэҕи быһаарар.
Алик Захаров, Света Слепцова 8-с кылаас.
Сарсыардатын дьыбардаах этэ да, хата тоҥмотохпут. Оскуола массыыната оҕолору таспыта, онон кыһамньылаах, эппиэтинэстээх үлэлээх суоппардарбытыгар махталбытын тиэрдэбит. Сорох сүрэҕэлдьээбит да оҕо баара, ол гынан салгыҥҥа күргүөм үлэттэн бары да астынныбыт.
«Арылы» медиа-киин