“На пути к творчеству” диэн ааттаммыт быыстапка станковай живопись сүрүн жанрдарын – мэтириэт, пейзаж уонна натюрморт – классическай ньыманан холустаҕа арыы кыраасканан суруллан, академическай үөрэх техникатын көрдөрөр.
Быыстапка аһыллыытыгар Гаврил дьиэ кэргэнэ, ускуустуба оскуолатын үөрэнээччилэрэ уонна уһуйааччылара, улуус дьаһалтатыттан Алена Пермякова о.д.а кыттыыны ыллылар. Оскуола үөрэнээччилэригэр, уруһуйу сэҥээрээччилэргэ Гаврил маастар-кылааһы ыытта.
Гаврил: “ Оскуола эрдэхпиттэн уруһуйдуубун. Дизайн коллеһыгар графическай дизайнерга үөрэнэ сылдьан, уруһуй эйгэтин сөбүлээн, ордорон, үрдэтинэр эбиппин диэн Арктикатааҕы судаарыстыбаннай институкка киирэн, быйыл дипломнай үлэбин көмүскээри сылдьабын. Көрөн, кэпсэтэ олорон мэтириэттэри уруһуйдуурбун ордоробун. Арыы кыраасканан, ону таһынан компүүтэргэ, планшекка графиканан уруһуйдуурбун сөбүлүүбүн”, — диэн кэпсиир.
Эдэр худуоһунньук Чурапчы нэһилиэгэр 1995 сыллаахха балаҕан ыйын 9 күнүгэр төрөөбүтэ. Чурапчы орто оскуолатыгар, салгыы улуустааҕы гимназияны үөрэнэн бүтэрбитэ. 2013 сыллаахха Дьокуускайдааҕы технология уонна дизайн коллеһыгар графическай дизайнер идэтигэр үөрэммитэ. Орто анал үөрэҕи баһылыыр кэрчик кэмигэр Бүтүн Арассыыйатааҕы уонна өрөспүүбүлүкэтээҕи куонкурустарга ситиһиилээхтик кыттара, үөрэҕин кыһыл дипломунан түмүктээбитэ. Үөрэммит идэтинэн биир сыл үлэлээн баран, 2018 сыллаахха култуура уонна ускуустуба Арктикатааҕы судаарыстыбаннай институтугар станковай жтвопись салаатыгар үөрэнэ киирбитэ. Икки үөрэх кыһатыгар үөрэнэ сылдьан, Бүтүн Арассыыйатааҕы үрдүк үөрэх кыһаларын “Студенческая весна” фестивалын регионнааҕы сүүмэрдиир түһүмэҕин кылаан кыайыылааҕа, түмүктүүр түһүмэҕин 2-с үрдэлин лауреата, аан дойдутааҕы “Пропилеи искусства” быыстапка-куонкуруска 2-с үрдэллээх дипломунан наҕараадаламмыта.
Гаврил быйыл муус устарга “Үргэл” арт-галереяҕа бастакы персональнай быыстапкатын туруоран, станковай живопись эйгэтигэр үлэлиир идэтийбит худуоһунньуктар кэккэлэригэр эрэллээхтик киирбитэ. Кини болотуналара эдэр киһи кыраҕы хараҕынан тулалыыр эйгэтин эҥинэ элбэх дьүһүннээн көрүүтүн тиэрдэллэр.
Быыстапка “Айылгы” НАДь Афанасий Мунхалов аатынан галереяҕа ахсынньы 9 күнүгэр диэри туруоҕа.
Елена Макаринская