Бу күннэргэ тиһэх чуораан улууспут бары оскуолаларыгар буолла. Мугудай оскуолатыгар бу тэрээһин үөрүүлээх чааһа 4-с, 9-с кылаастары бүтэрэр оҕолорго итиэннэ чуолаан 11-тэргэ, кинилэр төрөппүттэригэр, учууталларыгар анаан өрө көтөҕүллүүлээхтик, олус истиҥник ыытылынна. Мугудай нэһилиэгин баһылыга Николай Аммосов, Д.Д.Красильников аатынан орто оскуола дириэктэрэ Николай Пермяков, улуус кылаабынай бырааһа Николай Сивцев, улуустааҕы үөрэх управлениетыттан Николай Артемьев, бэтэрээн учууталлар, түөлбэ олохтоохторо, учууталлар, дьокутааттар эҕэрдэ, кэс тылларын эттилэр, кыргыттарга эҕэрдэ суруктары, бэлэхтэри туттардылар. Выпускниктар төрөппүттэрэ эмиэ үөрэппит учууталларга махтал тылларын анаатылар, бэлэхтэрин ууннулар. Кылаас салайааччыта Вера Баишева быйыл бүтэрэр үөрэнээччилэригэр Айта Даниловаҕа, Юлияна Пермяковаҕа, Аялита Рязанскаяҕа анаан оҥотторбут хаартысканан альбом-кинигэлэрин туттарда.
Оскуола үөрэнээччилэрэ музыкальнай нүөмэрдэринэн дьоро күнү киэргэттилэр, кыргыттар учууталларын кытары намыын вальска эргийдилэр, маҥнайгы учууталларынаан Анастасия Захаровалыын тиһэх чуорааны лыҥкыначчы тыаһаттылар.
Наталья Сибирякова, ааптар видеоҕа устуута