Саха норуодунай суруйааччыта Василий Яковлев-Далан аатынан Кытаанах орто оскуолатын ыспартыыбынай саалатыгар, улууска аан бастакытын Эһээ Дьыл бирииһигэр “Ылгын Боотур” уолаттар Оонньуулара үрдүк тэрээһиннээхтик буолан ааста.
Манна Сылаҥ, Кытаанах, Болугур, Болтоҥо, Соловьев, Арыылаах нэһилиэктэриттэн уонна Улахан Күөл учаастагыттан барыта холбоон 48 эр бэрдэ кэлэннэр бэйэлэрин кыахтарын тургутан көрдүлэр.
“Бу күрэхтэһии биһиги үүнэн иһэр ыччаттарбытын эт-хаан өттүнэн сайдалларыгар, инникитин улахан күрэхтэһиилэргэ улахан кыаҕы биэриэхтээх. Кыахтаах уолаттар чуолаан тыа сиригэр бааллар, биһиги ортобутугар. Билигин бу күрэхтэһии кэнниттэн тириэньэрдэр анаан-минээн тыыппалаах диэбит уолаттарын ылсаннар үлэлэһэн барыахтара. Салгыы маннык хабааннаах күрэхтэһиилэр тэриллэр буолуохтара, онуоха биһигин улууспут салалтата, үөрэх управлениета өйүөҕэ”, — диэн Кытаанах нэһилиэгин Аҕа баһылыга, бу оонньуулар сүрүн идиэйинэй настаабынньыктара Егор Николаевич Потапов санаатын үллэһиннэ.
2013-2015 сыллааҕы төрүөх уолаттарга барыта холбоон 20 эр бэрдэ кыттыыны ылла манна 5 көрүҥтэн түөрдүгэр 1 миэстэни ылан 8 очукуолаах Сылаҥ нэһилиэгиттэн Айысхан Дьячковскай муҥутуур кыайыылаах буолла. Кини кэнниттэн 12 очукуолаах эмиэ Сылаҥ нэһилиэгиттэн Айсен Макаров үрүҥ көмүс мэтээли кэттэ уонна 24 очукуолаах Арыылаах нэһилиэгиттэн Женя Терентьев боруонса мэтээлгэ тигистэ. Наҕараадалааһын кэмигэр кыра саастаах оҕолору успуорка угуйар физкултуура учууталлара, СӨ Успуорка миниистирэ Леонид Спиридоновтан махтал суруктары туттулар.
Онтон 2010-2012 сыллааҕы төрүөх уолаттарга 28 ыспарсымыан күөн көрүстэ, уопсай түмүккэ, үс көрүҥҥэ 1-кы, икки көрүҥҥэ 2-с миэстэлэри ылаттаан Болугур нэһилиэгиттэн Эр Хаан Новгородов муҥутуур кыайыылаах аатын сүктэ. Иккис миэстэни Соловьев нэһилиэгиттэн Арчын Собакин онтон үһүс миэстэни эмиэ Соловьев нэһилиэгиттэн Дамир Нифонов буолары ситистилэр.
Кыайбыт уолаттар мэтээллэринэн, грамоталарынан наҕараадаланнылар. Онтон атын уолаттар бука бары Кытаанах нэһилиэгин дьаһалтатыттан, үөрэх управлениетыттан, улуус дьаһалтатын успуорка управлениетын, «Дорожника» ХЭТ, Чурапчытааҕы ыспартыыбынай оҕону эбии сайыннарар оскуола киин ааттарыттан Саҥа дьыллааҕы бэлэхтэри туттулар.
Сэмэн Жендринскэй