Улуу Кыайыы 79 сылыгар аналлаах “Өйдүүбүт. Сүгүрүйэбит Кэриэстиибит.” декада ыытылынна. “Албан аат” уруоктара ыытылыннылар. “Килэнки кэскилэ” оҕо тэрилтэтин көҕүлээһинэн «Маҥнайгылар хамсааһыннара” үгүс өрүттээх үлэлэри тэрийдэ. “Кыайыы түннүгэ” , “Георгиевскай лента”, “Өлбөт үйэлээх полк”, “Кыайыы суруга”, “Кыайыыга кынаттаабыт хоһооннор” акцияларга көхтөөхтүк кытыннылар.
“Барс” байыаннай-патриотическай кулууп оҕолоро Улуу Кыайыы 79 сылыгар анаммыт миитиҥҥэ бочуоттаах харабылга турдулар, лидер Тимур Пономарев ветераннарга туһаайан эҕэрдэ тылы эттэ. “Кыайыы 80 сылыгар- 80 Үтүө дьыаланы” проект саҕаланан, үлэ ветераныгар А.В. Парфенова, байыаннай дьайыы кыттыылааҕа Н.Н. Владимиров төрөппүттэригэр, Аҕа дойду Улуу сэриитин кыттыылааҕа И.М. Нестерев төрөөбүтэ 100 сааһынан төрөппүт кыыһыгар Мотрена Ильничнаҕа мас хайытан, саһааннаан көмөлөспүттэрин иһитиннэрдэ, күүс өттүнэн Хоту көһүүгэ барбыттарга анаммыт сквергэ кылаастарынан сибэкки олордон, сайын устата бүөбэйдииргэ, көрөргө-харайарга ыҥырда. Ону таһынан Кыайыы 80 сылын көрсө “Кытаанахтар сэрии толоонугар” проект үлэтин салгыы ыытар былааннаахтарын иһитиннэрдэ.
Аҕа дойду Улуу сэриитин кэмигэр кыргыһыы толоонугар охтубут биир дойдулаахтарбытыгар анаммыт пааматынньыкка Өйдөбүнньүк гирлянда ууруутугар Дальнай Восток көҥүл тустууга призера Гоша Афанасьев, “Барс” ВПК командира Ньургун Собакин кытыннылар. Кыайыыга анаммыт дьаһаллартан биирдэстэрэ “Сэрии сылын уонна эйэлээх олох ырыалара“ концертка кытыннылар. Дьаһал Кыайыы вальсынан түмүктэннэ. Бу күн кылаастарынан строевой хаамыы уонна ырыа күрэҕэ ыытылынна. Кыайыылаахтарынан 3 кылаас, 8 кылаас уонна 9 кылаас коллективтара буоллулар. Декада ыам ыйын 8 күнүгэр «Геройдарга тэҥнэһэбит» коммунарскай оонньууларынан түмүктэннэ.
Сбор кэмигэр сэрии кэминээҕи ырыалары ыллаатылар, тыыл ветераннарыгар дьиэлэринэн сылдьан “Ветераҥҥа махтал” эҕэрдэ открыткалары туттардылар, эҕэрдэ ырыалары тиэртилэр. 4 команданан арахсан военизированнай эстафетаҕа кытыннылар, “Мин оскуолам инникитэ” проект көмүскээһинэ тэрилиннэ. Сбор кэмигэр Улуу Кыайыы памятнигар “Кыайыы сардаҥалара” акция ыытылынна.
Лена Терютина