Кытаанах нэһилиэгэр СӨ ситэриилээх былааһын 2023 сыллаах үлэтин отчуота буолла.
Мунньах саҕаланыытыгар СӨ Бырабыыталыстыбатын бэрэссэдээтэлин 1-кы солбуйааччыта Джулустан Борисов дьиэ туттарга эбэтэр атыылаһарга социальнай төлөбүр ылар туһунан сибидиэтилистибэни эдэр ыалга Василий уонна Туйаара Потаповтарга туттарда.
Маны тэҥэ үтүө суобастаах, бэриниилээх үлэтин иһин «СӨ Доруобуйа харыстабылын туйгуна» бочуоттаах бэлиэни Чурапчытааҕы киин балыыһа биэлсэригэр Айталина Потаповаҕа ытыс тыаһын доҕуһуолунан туттарда.
Салгыы сүрүн дакылаады оҥордо. Ол кэнниттэн нэһилиэнньэ Бырабыыталыстыба бөлөҕөр кыһалҕалаах ыйытыыларын биэрдилэр, санааларын эттилэр. Үгүс боппуруос тыа хаһаайыстыбатыгар сыһыаннаах буолла. Онон отчуокка туһааннаах министиэристибэттэн бэрэстэбиитэл кэлбэтэҕиттэн хомойоллорун биллэрдилэр. Олохтоохтор «Балбаах» сокуонун, ынах-сүөһү төбөтүгэр ылбыт көмөнү отчуоттааһын, кэтэх хаһаайыстыбалаах дьиэ кэргэҥҥэ чэпчэтиилээх ипотеканы биэрии туһунан ыйыттылар. Сири оҥорууга итиэннэ оттуурга сэлээркэ сыаната үрдээбитинэн туһааннаах көмөлөр көрүллэллэригэр туруорустулар. «Агростартап» куонкуруһун ирдэбилэ саҥа саҕалааччы фермердарга уустугун бэлиэтээн туран, балаһыанньатын чэпчэтэргэ көрдөстүлэр.
Бу нэһилиэккэ хочуолунай боппуруоһа, саҥа балыыһа тутуута уонна хайыһар манеһын өрөмүөннээһин сытыытык турда.
Билигин үлэлии турар хочуолунай оһохторо уларыйбатахтара тоҕус сыл буолбут. Онон оһох эргэрэн, хочуолунай акылаата түһэн, температура күүскэ таҕыстаҕына тэстэ тураллар. Манна эбии мөлтөх хаачыстыбалаах чохтору тиэйэн, дьиэлэр сылыйбаттар эбит. Онуоха олохтоохтор үс оһоҕу уларытарга, акылааты көннөрөргө итиэннэ чох хаачыстыбатын хонтуруолга ыларга туруорустулар.
Маны таһынан инбэлииттэргэ уонна доруобуйаларынан хааччахтаах оҕолоох ыалга, региоҥҥа байыаннай дьайыы кыттыылаахтарыгар көрүллэр өйөбүллэр тустарынан, кырдьаҕастары эмтиир уонна доруобуйаларын чэбдигирдэр санаторий путевкатын туоһуластылар. Чурапчыга атын улуустартан уот тарыыба үрдүгүн туһунан чопчуластылар. Бэйдиэ сылдьар ыттар элбээн, дьоҥҥо кутталы үөскэтэллэрэ улааппытын бэлиэтээн туран, манна туох үлэ ыытылларын сурастылар. Киинтэн ититиигэ холбонорго көмө көрүллэригэр, уот бардаҕына, төлөпүөн сибээһэ сүтэрин, ону быһаарарга туруорустулар. Итини тэҥэ гастааһын үлэтин, нэһилиэктэр икки ардыларынааҕы суолу оҥоруу, Наммара үрэх быһытын чөлүгэр түһэрии наадатын эттилэр.
Бу күн СӨ Тутуу миниистирин 1-кы солбуйааччыта Евгений Афанасьев салайааччылаах үһүс бөлөх хочуолунайга, амбулаторияҕа сырыттылар. Салгыы Кытаанах орто оскуолатыгар педагогтары кытта көрүстүлэр. Дьаһалга үөрэх эйгэтигэр турар сүрүн кыһалҕалары дьүүллэстилэр. Ол курдук, билиҥҥи кэмҥэ ханнык баҕарар кытыы сытар нэһилиэккэ учуутал тиийбэтэ, хамнас кырата бэлиэтэнэр. Кытаанахха да, бу боппуруос туора турбат. Онуоха сөптөөх усулуобуйаны тэрийиигэ оскуола үлэһиттэрэ тус санааларын үллэһиннилэр. Ол түмүгүнэн ылыллыбыт быһаарыныылар боротокуолга киирдилэр.
Марфа Петрова.