Аан дойдуну аймаабыт, кыа хаанынан Ийэ сири ытаппыт, алдьархайдаах сэриини элбэх кыһалҕанан, өлүүнэн-сүтүүнэн биһиги эһэлэрбит, аҕаларбыт, убайдарбыт кырыктаах өстөөҕү кыайан, Улуу Кыайыыны уһансыбыттара быйыл өрөгөйдөөх 80 сылын туолар.

1945 сыллаахха Берлин куоракка Рейхстах үрдүгэр Сэбиэскэй саллааттар өстөөҕү кыайбыт бэлиэлэринэн кыһыл былааҕы харах уулаах «Ураа!» хаһыынан күөрэччи туппуттара.

Өрөспүүбүлүкэ үрдүнэн Улуу Кыайыы 80 сылыгар аналлаах «Кыайыы Знамята» эстэпиэтэни бүгүн, күн бастакы аҥаарыгар Арыылаах, Кытаанах, Сылаҥ уонна Чурапчы нэһилиэктэрин олохтоохторо — оҕолортон саҕалаан, ытык кырдьаҕаһыгар тиийэ сүһүөххэ туран көрүстүлэр.

Былааҕы бу нэһилиэктэргэ Бойобуой дьайыы бэтэрээннэрэ Петр Сивцев, Илья Слепцов уонна Василий Монастырев күөрэччи тутан эдэр байыастарга өрө көтөҕүллүүлээхтик туттардылар.  Ол курдук, Кыайыы знамятын тутар чиэскэ тигистилэр: Арыылахха Т.М. Каженкин аатынан Арыылаах орто оскуолатын Сергей Дагданча салайааччылаах «Бэдэр» байыанай-патриотическай кулуубун байыастара  Иван Попов, Альберт Иванов, Виталий Борисов,

Кытаанахха  В.С.Яковлев — Далан аатынан Кытаанах орто оскуолатын «Барс» байыаннай-патриотическай кулуубун байыастара — хамандыыр Айсен Терютин, 11-с кылаас туйгун үөрэнээччитэ Егор Пономарев, улууска «Бастыҥ уопсастыбанньык» кыайыылааҕа  Виталий Гоголев, «Патриот» эдэр аармыйа патриотическай кулуубун хамандыыра Мичил Пономарев,

Сылаҥҥа профессор Г.П. Башарин аатынан Сылаҥ орто оскуолатын 10-с «б» кылааһын үөрэнээччилэрэ Айтал Сивцев, Эрсан Носов, Мичил Винокуров.

   

Үс нэһилиэккэ дьаһал кыттыылаахтара Дойдубут, өрөспүүбүлүкэбит өрөгөй ырыаларын сүһүөхтэригэр туран иһиттилэр уонна олох туһугар охсуспут, олохторун толук уурбут саллааттарга сүгүрүйэн, ытыктаан, биир мүнүүтэ иһийэн турдулар.

Салгыы Кыайыы Знамятын Чурапчы нэһилиэгэр А.И.Федотов аатынан элбэх функциялаах спорт комплексыгар көрүстүлэр. Былааҕы И.М. Павлов аатынан Чурапчы орто оскуолатын «Память» байыаннай-патриотическай кулууп иитиллээччилэрэ туттулар.

 

Долгутуулаах дьаһалга саалы толору кэлбит С.А.Новгородов аатынан Чурапчы орто оскуолатын үөрэнээччилэрин хора «День победы» ырыаны олус үчүгэйдик толорон, ньиргиттэ. Салгыы «Беркут» байыаннай-патриотическай кулууп иитиллээччилэрин көрдөрүү нүөмэрдэрэ бүппүтүгэр ытыс тыаһа хабылла түстэ.

Улуус баһылыга Степан Саргыдаев, нэһилиэк баһылыгын бастакы солбуйааччы Уйгулан Туласынов эҕэрдэлээн туран, Улуу Кыайыы 80 сылыгар Кыайыы өрөгөйө, ил-эйэ олоҕо тосхойоругар баҕа санааларын эттилэр.

Санатан эттэххэ, Улуу Кыайыы 80 сылын көрсө өрөспүүбүлүкэтээҕи «Кыайыы знамята» эстэпиэтэ тохсунньу 9 күнүгэр сахалартан бастакы Сэбиэскэй сойуус дьоруойа Фёдор Попов төрөөбүт дойдутуттан, Мэҥэ Хаҥалас улууһун Баатара нэһилиэгиттэн саҕаламмыта. Кыайыы кыһыл знамята бэҕэһээ Уус Алдан улууһуттан Чурапчы улууһугар долгутуулаах быһыыга-майгыга бэриллибитэ.

Марфа Петрова.