Ааспыт сыл Саха сиригэр физкултуурнай хамсааһын 100, Улуу тириэньэр Дмитрий Петрович Коркин 95 сыллаах үбүлүөйдэрин бэлиэтээтибит. Күн-бүгүн, Саха Сиригэр физкултуураҕа күргүөмнээх хамсааһыны төрүттээччилэртэн биирдэстэрэ, өрөспүүбүлүкэҕэ көҥүл тустуу сайдарыгар сүҥкэн өҥөнү оҥорбут Николай Николаевич Тарскай 100 сыллаах үбүлүөйүнэй турнира саҕаланар.
“Ат сүүрдэҕинэ, ыт хаалсыбат” дииллэринии, убайдарым, ыспартыыбынай суруналыыстар Былатыан Куоркун уонна Бүөтүр Павлов суруйууларын өссө эбии наардаан, чуолкайдаан биэриэм. Эрдэ этиллибитин курдук өрөспүүбүлүкэҕэ көҥүл тустууга чөмпүйэнээтэ 1956 сылтан саҕалаан ыытыллар. Бу кэм устата элбэх бөҕөс чөмпүйүөн үрдүк аатын ылла.
Кинилэр ортолоругар хастыыта эмэ бастаабыт тустууктар үгүстэрин кэриэтэ Дмитрий Петрович иитиллээччилэрэ, Чурапчыга тустуу оскуолатыгар уһуйуллубут ыспарсымыаннар буолаллара саарбаҕа суох.
Тустуу көбүөрүгэр Игорь Кудрявцев диэн Зырянкаттан төрүттээх нуучча бухатыыра эмискэ күөрэйэн тахсыбыта. Улуу тириэньэр Дмитрий Петрович Коркин оскуолатын иҥин-дьиҥин толору ааспыт, ыарахан ыйааһыннаах бөҕөстөргө түргэн хамсаныылаах, үөһэттэн быраҕан түһэрэрин сөбүлээн туттар албастаах тустуук 1969 сылтан саҕалаан 1996 сыллаахха диэри өрөспүүбүлүкэҕэ 15 төгүл бастаабыта.
Онон Игорь Еремеевич Кудрявцев аата үйэлэр тухары Саха сирин тустуутугар саамай элбэхтэ бастаабыт бөҕөс быһыытынан өрүү ааттана туруоҕа.
Бастыҥ көрдөрүүлээх Дмитрий Петрович Коркин иитиллээччилэрэ уонна кини аатынан интэринээт-оскуолаҕа үөрэммит чөмпүйүөннэр:
Игорь Кудрявцев – 15;
Юрий Андреев – 13;
Максим Васильев – 10;
Захар Чукров – 8;
Роман Цыпандин – 8;
Максим Сибиряков — 7;
Анатолий Константинов – 7.
Алта төгүллээх чөмпүйүөн: Константин Власов.
Биэстии төгүллээх чөмпүйүөннэр: Василий Гоголев, Кирилл Захаров.
Түөртүү төгүллээх чөмпүйүөннэр: Гавриил Дмитриев, Петр Шестаков, Николай Рожин, Айаал Павлов.
Үстүү төгүллээх чөмпүйүөннэр: Вячеслав Карпов, Виктор Михайлов, Илларион Федосеев, Афанасий Монастырев, Николай Коркин, Егор Алексеев, Ньургун Скрябин, Кузьма Сивцев.
Иккилии төгүллээх чөмпүйүөннэр: Алексей Ермолаев, Семен Морфунов, Алексей Пахомов, Василий Уваров, Прокопий Иванов, Петр Христофоров, Егор Старостин, Николай Матвеев, Иннокентий Егоров, Алексей Стручков, Валерий Керемясов, Василий Жирков, Борис Борисов, Данил Неустроев, Юрий Старостин, Николай Аянитов, Вадим Семенов, Эдуард Григорьев, Федор Постников.
Онон, бүгүҥҥү тустуу бырааһынньыгынан бука барыгытын эҕэрэдэлээн туран, Дириҥтэн төрүттээх, Дмитрий Коркин иитиллээччитэ, Олимпийскай чөмпүйүөн Павел Пинигин: «Саха баарын тухары тустуу баар буолуоҕа», — диэн тылларынан түмүктүүбүн.
Сэмэн Жендринскэй