Алаҕар Бахсы ыпсыытыгар баар икки эрэ ыал олорор Хомустаах сайылыккка сааскы ылааҥы күннэр ааһаннар, самаан сайын саҕаланыыта Дардайдар диэн аҕа уустарыгар биир туспа үөрүү буолбута: Маппый уола Өлөксөөндүрдээх саламаат буһаран, собо үөлэн, саҥа төрөөбүт уол оҕолорун малааһыннаабыттара. Оҕону Мэхээлэ диэн ааттаабыттара. Өлөксөөндүрдээх, оҕолоругар өлүүлээх буолан, уолларын Михаил Кононович Решетниковка ииттэрэ биэрбиттэрэ. Ити 1908 сыллаахха этэ.
Бодойбоҕо 1912 сыллаахха Ленатааҕы ытыалааһыҥҥа Михаил Кононович атаҕын жандарм буулдьата тобулу көппүтэ. Уол киниттэн “баттал”, “бириискэ”, “шахта”, “ыраахтааҕы”, “Лена”, “полиция” диэн тыллары аан бастаан истибитэ.
Миша маҥнайгы кылааска 1916 сыллаахха Дьокуускайга Преображенскай начаалынай оскуолатыгар киирбитэ. Онтон үһүс кылааһы 1918 сыллаахха Бахсыга тахсан бүтэрбитэ. Салгыы үөрэнэ сырыттаҕына бандьыыттар кэлэннэр оскуола сабыллан хаалбыта.
1925 сыллаахха нэһилиэк Сэбиэтин исполкомун сэкирэтээринэн, сир үллэһигэр суруксутунан үлэлии сылдьан Миша кылаас өстөөхтөрүн утарсыыларын үгүстүк көрсөрө.
1926 сыллаахха кооператив табаарын бандьыыттар иһэллэриттэн күрэтэн, нэһилиэнньэҕэ тарҕатыллыбыт иэһи хомуйар ликвидком бэрэссэдээтэлинэн сылдьан икки сыл устата Алаҕар, Дьабыыл, Бахсы олохтоохторуттан ону “Холбоско” киллэрэн туттарбыта.
Эһиилгитигэр “Салҕабылтан” тахсан Бахсыга кредитнэй табаарыстыбаны тэрийбитэ уонна онно бэрэссэдээтэлинэн үлэлээн, дьадаҥыларга Сэбиэскэй былаас көмөлөһөр бэлиитикэтин олоххо киллэрсибитэ. Ол сылдьан Дьокуускайга элбэх булуугу, тарааҕы, бурдук көтүтэри, триери, сэппэрээтэрдэри о.д.а. таһааран тарҕаппыта. Саҥа экономическай бэлиитикэ (НЭП) саҕана көлө булунарга, ынах атыылаһарга, ыһыы бурдугун булунарга “Салҕабылтан” быстар дьадаҥыларга үбү биэриигэ көмөлөһөн үлэлэспитэ.
Михаил Михайлович нэһилиэк Сэбиэтин бастакы быыбарыгар быыбары ыытар хамыыһыйаҕа чилиэнинэн сылдьан, кулаактар уонна аҕабыыттар куоластарын быһыыга кыттыбыта. Бэйэтин дьиэтигэр уонтан тахса киһини ликбезкэ сырытыннарбыта. 1928 сыллаахха Михаил Михайлович ол үөрэппит дьоннорун түмэн, ыаллары кэрийэн агитациялаан, 15 хаһаайыстыбалаах “Күүһүрдэр” диэн бастакы табаарыстыбаны (ТСОЗ) тэрийбитэ. Нөҥүө сылыгар артыаллары тэрийиигэ хамыыһыйа бэрэссэдээтэлинэн үлэлии сылдьан Тандаҕа “Кыһыл Танда”, Алаҕарга “Дүөлү”, Кэссиэҕэ “Сэрбэдэй” (кэлин “Холболоох”) диэн арыаллары тэрийсибитэ.
Михаил Михайлович 1932 сылтан Дьокуускайга киирэн дуогабардаһан “Якутпушнинаҕа” дэһээтинньигинэн уонна прорабынан үлэлээн хоту уонна соҕуруу Саккырыырдарга сылдьыбыта. Онтон кэлэн Дьокуускайга контролер-ревизордар куурустарын бүтэрбитэ уонна 1942 сылга диэри Чурапчыга хонтуруоллуур ревизионнай управление ревизорунан үлэлээбитэ.
1942-1946 сылларга Дьокуускайга Үп наркомугар үлэлээбитэ. Онно сылдьан “Үлэҕэ килбиэнин иһин” мэтээлинэн наҕараадаламмыта. Ити кэмҥэ Ленинградка үп салаатын сэбиэдиссэйдэрин бэлэмниир кууруска үөрэнэн баран, 1950 сыллаахха диэри Анаабыр оройуонугар үп салаатыгар сэбиэдиссэйдээбитэ.
Кэлин Ытык Күөлгэ хомунаалынай тэрилтэлэр уонна тупсаран оҥоруу кэмбинээтин дириэктэринэн, Алексеевскай оройуоннааҕы булт уопсастыбатын бырабылыанньатын бэрэссэдээтэлинэн үлэлээбитэ оттон 1968 сыллаахха сааһынан бочуоттаах сынньалаҥҥа тахсыбыта.
Михаил Михайлович үгүс уопсастыбаннай үлэни толорбута. Ол курдук, Алексеевскай оройуоҥҥа пааматынньыктары харыстыыр уопсастыба салаатын тэрийэн 6 сыл устата бэрэссэдээтэлинэн үлэлээбитэ. Үгүс тимир, бетон пааматынньыктары оҥотторбута. Кини Чурапчыга улахан үбүлүөйүнэй пааматынньыгы, Бахсыга сэриигэ өлбүттэргэ анаан пааматынньыгы, “Саха сиригэр Сэбиэскэй былаас олохтоммута 50 сыла” диэн монумены, Мэҥэ Хаҥаласка Петровка сэлиэнньэҕэ сэриигэ өлбүттэргэ аналлаах тимир-бетон о.д.а. пааматынньыктары оҥорторбута.
Михаил Михайлович 6 сыл устата Култуура уонна устуоруйа пааматынньыктарын харыстыыр уопсастыба өрөспүүбүлүкэтээҕи сэбиэтин, булчуттар уонна балыксыттар уопсастыбаларын өрөспүүбүлүкэтээҕи сэбиэтин чилиэннэринэн өр кэмҥэ үлэлээбитэ. 1965 сыллаахха сэтинньигэ Ленинградка буолбут булчуттар уонна балыксыттар уопсастыбаларын Бүтүн Арассыыйатааҕы үһүс сийиэстэригэр Саха сириттэн дэлэгээтинэн сылдьыбыта.
Кэлин Михаил Михайлович Решетников Албан аат кулуубун оройуоннааҕы сэбиэтин чилиэнинэн үлэлээбитэ.
Сэмэн ЖЕНДРИНСКЭЙ