Сахабыт сиригэр аам-даам тымныы сатыылаан турар кэмигэр, ахсынньыга Алдан оройуонугар Арассыыйаҕа бигэтик биллэр, хайыһар спордугар олимпийскай эрэллэри бэлэмниир Кииҥҥэ ох саанан ытыыга күрэхтэһиилэр үрдүк таһымнаахтык ыытылыннылар.
Ол курдук, ахсынньы 13 күнүттэн саҕалаан оҕолорго өрөспүүбүлүкэҕэ бастыыр иһин күрэх буолла. Манна Д. П.Коркин аатынан успуорт интэринээт-оскуолатын 10 кылааһын үөрэнээччитэ Айсен Давыдов үһүс бочуоттаах миэстэни ылары ситистэ. Онтон ахсынньы 17 күнүттэн төрүт ох санаан ытыыга, классическай уонна блок көрүҥнэргэ чөмпүйэнээт ыытылынна.
Чөмпүйэнээт үөрүүлээх аһыллыытыгар Чурапчы улууһун бэтэрээн охчуттарыгар Гаврил Яковлевка уонна Ульяна Гермогеноваҕа «Сахаада» успуорт маастарын бэлиэтин туттардылар.
Көмүстээх Алдантан көмүс мэтээллэри улууспут чулуу бэргэн ытааччылара, төрүт ох сааны толору баһылаабыт Эльвира Ефимова уонна Александр Дьяконов аҕаллылар. Кинилэр эрэллээхтик өрөспүүбүлүкэ чөмпүйүөннэринэн буоллулар. Даҕатан эттэххэ, Александр Валерьянович, улуустааҕы ох саа федерациятын салайааччыта, икки төгүллээх Саха сирин чөмпүйүөнэ буолла.
Олимпийскай көрүҥҥэ, классическай ох сааҕа успорт оскуолатын 10 кылааһын үөрэнээччиэрэ Долун Божедонов уонна Александр Седалищев улахан дьон бөлөхтөрүгэр холонон көрдүлэр. Долун бу күрэххэ Арассыыйа успуордун маастарыгар кандидат нуорматын толорон, үөрүүтэ үксээтэ. Саша Седалищев аҕыйах очукуонан бириистээх миэстэҕэ тиксибэтэр, кэскиллээҕин көрдөрдө.
Блок ох сааҕа биирдиилээн бастыыр иһин ытыыга Дьулус Захаров дьоһун ытыыны көрдөрөн, үһүс миэстэ иһин киирсиигэ Муома спортсменыттан бэрт кыра очукуонан сабырыйтаран, төрдүс миэстэҕэ тигистэ. Бу көрүҥҥэ хамаанданан күрэхтэһиигэ успуорт-интэринээт оскуола 10 кылааһын үөрэнээччитэ Айсен Давыдов чахчы бэргэн охчут буоларын бигэргэттэ. Ол эрээри хамаанда хаҥаластар хамаандаларыттан сыччах биир очукуонан хотторуу хомолтотун биллилэр. Айсен тохсунньу ыйга оҕолорго Саха сирин сүүмэрдэммит хамаандатыгар киирэн, Орел куоракка үс күрэхтэһиигэ кыттыахтаах. Эдэр ыспарсымыаҥҥа ситиһиилэри баҕарабыт.
Улууспут улахан дьоҥҥо хамаандата бу күрэхтэһиигэ сынньалаҥнык сырытта. Тэрийээччилэр хас биирдии кыттааччыны бэлэмнээхтик көрүстүлэр. Түспүт сирбититтэн күрэхтэһэр саалбытыгар диэри анал автобуһунан сырыттылар. Түгэнинэн туһанан, улуус дэлэгээссийэтин иилээн-саҕалаан салайан илдьэ сылдьыбыт улуустааҕы ох саа федерациятын салайааччыта Александр Валерьяновичка махталбын тиэрдэбин.
Сергей Майоров, Чурапчытааҕы Д.П. Коркин аатынан олимпийскай эрэллэри бэлэмниир спортивнай оскуола ох сааҕа салаатын тренерэ.
