Арассыыйаҕа норуоттар сомоҕоһууларын күнүн көрсө Калининград уобалаһыгар Аҕа дойду сэриитин кыттыылааҕа, сахаттан бастакы летчик-дьахтар Вера Кирилловна Захароваҕа аналлаах мемориальнай дуоска аһылынна.
Бэлиэ дьаһалга «Земляки Саха» түмсүү ыҥырыытынан, Саха сириттэн 23 киһилээх дэлэгээссийэ кытынна. Олор истэригэр Вера Кирилловна аймахтара, Чурапчы улууһуттан 15 киһи баар.
Мемориал аһыллыытыгар Вера Кирилловна аймахтарын аатыттан Светлана Захарова, Полина Герасимова махтал тыл эттилэр. Улуус дэлэгээссийэтин аатыттан Кытаанах нэһилиэгин баһылыгын солбуйааччы Екатерина Скрябина биир дойдулаахтарбытыгар маннык кэриэстэбил бэлиэлэрэ туруоруллан, үйэтитиллэрэ үөрүүлээҕин бэлиэтээн туран, дуоска аһыллыытыгар үлэлээбит дьоҥҥо-сэргэҕэ эҕэрдэ суруктары, бэлэхтэри туттарда.
Бу дьаһал туһунан Екатерина Скрябина билиһннэрдэ:
— Аҕа дойду улуу сэриитин кыттыылаахтарын кэриэстиир аллеяҕа биир дойдулаахпыт сырдык аата «ИХСАН» диэн Ислам итэҕэлин түмсүүтүн бэрэсэдээтэлэ Явер Гусейнов көҕүлээһининэн үйэтитилиннэ. Вера Кирилловна байыаннай летчик быһыытынан сэриигэ кыттыбыта, билиэҥҥэ түбэһэн эрэйи-муҥу көрбүтэ тэрийээччи Явер Гусейнов уйулҕатын хамсаппыт. Кини Вера Кирилловна Польша Торн куоратыгар концлагерга сыппытын, бу куорат Калининград уобаластан чугаһын бэлиэтээтэ.
Бу күн Калининград уобалаһын уопсастыбаннай палататын саалыгар Аҕа дойду сэриитигэр Кёнинсберг (Калининград) куораты босхолооһуҥҥа кыттыбыт саха саллааттарын хорсун быһыыларын, дьоруойдуу охсуһууларын ахтар, кинилэри үйэтитэр сыаллаах кэмпириэнсийэ буолла. Манна Светлана Захарованы кытта Вера Кирилловна аҕатын Кирилл Петрович Захаров дьиэ кэргэнин туһунан киэҥ ис хоһоонноох дакылаатынан кыттынныбыт. Дьаһал кыттыылаахтара олус болҕомтолоохтук, сэҥээрэн иһиттилэр.
Киэн туттар Вера Кирилловна Захароваҕа аналлаах дьаһалларга Калининград уобалаһыгар муниципальнай сайдыы уонна ис бэлитиикэ министиэристибэтин отделын салайааччыта Валерий Егоркин, Гурьевск оройуонун баһылыга Сергей Подольскай, Улахан Косово бөһүөлэк салалтата, Дьокуускайдааҕы 30 нүөмэрдээх орто оскуола администрацията, «Сокол» патриотическай кулууп чилиэннэрэ, Өлүөхүмэ улууһун «Түмсүү» землячествота, Калининградка олорор сахалар кыттыыны ыллылар.
Түгэнинэн туһанан элбэх киһилээх дэлэгээссийэни өйөөбүт улуус салалтатыгар, Кытаанах нэһилиэгин баһылыгар Егор Потаповка, С.А.Новгородов аатынан Чурапчы орто оскуола дириэктэрэ Надежда Уароваҕа, Чурапчытааҕы мусуой дириэктэрэ Юрий Толстоуховка махталбытын тиэрдэбит.
Марфа Петрова.
