Быйыл бу оскуоланы 13 оҕо үөрэнэн бүтэрдэ. Үөрүүлээх тэрээһин Саха сирин уонна Арассыыйа гимнэринэн саҕаланна.
Тиһэх чуораан долгутуулаах күнүгэр оскуола дириэктэрэ Иван Васильев, Чурапчы нэһилиэгин баһылыга Владимир Сивцев, улуус дьаһалтатын социальнай хайысхаҕа исписэлииһэ Алена Пермякова, үөрэх управлениетын начаалынньыгын солбуйааччы Ираида Винокурова, “Кыталык” уһуйаан сэбиэдиссэйэ Варвара Пудова, үөрэтэр-производственнай кэмбинээт дириэктэрэ Анатолий Александров оскуоланы бүтэрээччилэри эҕэрдэлээн туран, быйылгы үөрэх дьылыгар үөрэхтэригэр, араас таһымнаах куонкурустарга ситиһиилээх, уопсастыбаннай үлэҕэ-хамнаска көхтөөх оҕолорго анал бириэмийэлэри, грамоталары, махтал суруктары туттардылар.
Быйыл буойун учуутал И.М. Павлов аатынан улахан бириэмийэни Радик Кривошапкин, үтүөлээх учууталлар Мария, Кирилл Пермяковтар ааттарынан бириэмийэни 9-с кылаас үөрэнээччитэ Эрсан Макаров туттулар.
Оскуоланы бүтэрээччилэр намыын муусука доҕуһуолугар вальс үҥкүүгэ эргийдилэр, долгутуулаах түгэҥҥэ бүттүүн бары тиһэх чуорааны лыҥкыната тыаһаттылар.
Оҕолорбут судаарыстыбаннай эксээмэннэрин ситиһиилээхтик туттаран, сөбүлүүр идэлэригэр туттарсан, устудьуон үрдүк аатын сүгэллэригэр, төрөөбүт улуустарын, өрөспүүбүлүкэлэрин чиэстээхтик ааттатар дьоһун дьон буолан тахсалларыгар баҕарабыт.
Лидия Попова