Хоптоҕоттон Новгородовтар Бүтүн Арассыыйатааҕы дьиэ кэргэн династияларын куонкуруһугар кыттыахтара

Куонкурус тохсунньу 20-22 күннэригэр Москваҕа “Родные-Любимые” Бүтүн Арассыыйатааҕы дьиэ кэргэн форумун чэрчитинэн ыытыллыаҕа. Форум Дьиэ кэргэн сылын аһыллыытын бастакы тэрээһининэн буолар.

Новгородовтар дьиэ кэргэн бу куонкуруска Саха сирин чиэһин көмүскүөхтэрэ. Аял Прокопьевич уонна Валентина Ревовна 6 оҕолорун, 2 сиэннэрин уонна эбэлэрэ Валентина Егоровналыын кыттыыны ылыахтара.

Аял Прокопьевич Дириҥнээҕи искусство оскуолатын дириэктэрэ, Валентина Ревовна бу оскуола хореограба, улахан кыыс Алина “Байанай” ХЭТ буҕаалтыра, Дарьяна уонна Марьяна 1-кы куурус устудьуоннара, Ариан уонна Рево 5-с-6-с кылаас үөрэнээччилэрэ. Иккис кыыс Сайаана уонна күтүөт Василий Гороховтар икки кырачаан оҕолоохтор. Күтүөттэрэ “Объединенная сила севера” ММА толорор дириэктэрэ, билигин Байыаннай дьайыыга гуманитарнай өҥөнү оҥорор пууҥҥа баҕа өттүнэн сылдьар.

Үс күннээх куонкуруска дьиэ кэргэттэр араас хайысхалаах сорудахтары толоруохтара. Ол курдук, эбэлэр, эһэлэр оҕолорун уонна сиэннэрин ВДНХ иһинэн экскурсиялатыахтара, кинилэр кэмнэрэ хайдаҕын, ону таһынан бэйэлэрин регионнарын интэриэһинэй түгэннэрин кэпсиэхтэрэ.

Дьиэ кэргэн ырысыабынан киэһээҥҥи аһылыгы астаан көрдөрүөхтэрэ, айан таһаарар сорудахтары толоруохтара, лекциялары, маастар-кылаастары ыытыахтара, урукку дьиэ кэргэн хаартыскатын хатылаан түһүөхтэрэ уонна “Связь поколений” викторинаҕа кыттыахтара.

Биир дойдулаахтарбытыгар ситиһиини баҕарыаҕыҥ!

Елена Макаринская