Саха өрөспүүбүлүкэтин тутууга миниистирин бастакы солбуйааччы Евгений Афанасьев салайар отчуоттуур бөлөҕө күн иккис аҥаарыгар Хоптоҕоҕо үлэлээтэ. Мунньаҕы нэһилиэк баһылыга Алексей Бурцев сүрүннээтэ. Отчуоту 104 киһи иһиттэ. Сүрүн дакылаат кэнниттэн ыйытыылар уонна этиилэр тэҥинэн киирдилэр.
Тыа хаһаайыстыбатын Бочуоттаах бэтэрээнэ Семен Сергеев өрөспүүбүлүкэ үрдүнэн сүөһү, сылгы ахсаанын, үүтү соҕотуопкалааһын туругун сураста. Тыа хаһаайыстыбатын салааларыгар үлэлиир үлэһиттэргэ пособие көрүллүүтүн, тыа сирин олохтоохторун биэнсийэҕэ тахсар саастарын уруккунан хаалларар туһунан Арассыыйа таһымыгар туруорсарга этиилэрин киллэрдэ. Итини тэҥэ урукку сылларга тыа хаһаайыстыбатыгар үлэлээн биэнсийэҕэ тахсыбыт дьон биэнсийэлэрин эбии үрдэтэргэ туруоруста.
Егор Адамов бөһүөлэк иһинээҕи дьүөдьэ кытыла сиҥнэн, сүөһү да, тиэхиньикэ да сылдьарыгар кутталламмытын эттэ. Кытылы бөҕөргөтүүгэ ханнык бырагыраамалар үлэлииллэрин, ханнык тэрилтэни кытта үлэлэһиэххэ сөбүн ыйытта, үлэ ыытыллара наадатын бэлиэтээтэ. Оттон доруобуйа харыстабылын бэтэрээнэ Анисия Иванова саҥа балыыһа дьиэтэ тутулла турарын, бу эбийэги туттарыыга биир дойдулааҕа Павел Пинигин улахан өйөбүлүн иһин махтанна. Итиэннэ спорт сааланы өрөмүөннээһин боппуруоһун туруоруста.
Инбэлииттэр олорор усулуобуйаларын тупсарыыга, дьиэни ылыыга элбэх оҕолоох ыал статуһун, “Материнская слава” мэтээл иҥэриллиитигэр балаһыанньатын, онуоха ханнык көрүҥ чэпчэтии көрүллэрин, уматык сыанатын чэпчэтиигэ туох үлэ ыытылларын туһунан ыйытыылар киирэн эппиэттэннилэр. Оскуола дириэктэрэ Михаил Игнатьев Национальнай бырайыакка олоҕуран, оскуоланы хапытаалынай өрөмүөннээһин боппуруоһун көтөхтө.
Төрөппүттэн оскуола үлэһиттэрэ тоҕо 5 күн үлэлээбэттэрин туһунан боппуруос, үүт харчыта хойутаан төлөнөрүн, үүт аналиһын сыаната сотору-сотору үрдүүрүн, гаас ситимигэр холбонууга субсидия көрүллүүтүн туһунан ыйытыылар болҕомто киинигэр турдулар.
Мэлдьэхси учаастагын олохтооҕо Саргылана Ефимова хочуолунайы саҥардыы боппуруоһун көтөхтө, итини тэҥэ урукку сылларга улахан ойуур уота туран, бөһүөлэк сирэ-уота алдьанан ууга барар кутталлааҕын, онон быһыты оҥорору туруоруста. Аҕыйах нэһилиэнньэлээх учаастакка суотабай сибээһи киллэрии ордук сытыытык турарын бэлиэтээтэ. Анал байыаннай дьайыыга сылдьар байыастары дойдуларыгар төнүннэриигэ кэккэ ыйытыыларын биэрдэ.
Музыкальнай оскуола дириэктэрэ Аял Новгородов саха бастакы балерината Аксенья Посельская быйыл төрөөбүтэ 100 сыла туоларынан, киниэхэ аналлаах пааматынньыгы туруорарга өрөспүүбүлүкэттэн үбүлээһинин көрөргө туруоруста. Ону тэҥэ Музыкальнай оскуола билигин хас да эбийиэгинэн тарҕанан үлэлии олорорун этэн туран, саҥа оскуоланы туттарарга этии киллэрдэ.
Тыа хаһаайыстыбатын бэтэрээн үлэһитэ Арина Егорова бэтэринээринэн өр сылларга үлэлээбитин, билигин ити хайысхаҕа каадырынан хааччыллыы мөлтөҕүн этэн туран, кэккэ санааларын туруоруста. Ону тэҥэ “Хаарбах дьиэттэн көһөрүү” бырагырааматынан чааһынай дьиэлэри тутууга эмиэ анал бырагыраама үлэлииригэр санаатын үллэһиннэ. Ыччаттар ааттарыттан Кирилл Пестерев Сынньалаҥ дьиэтэ эргэрбитин, онон саҥа эбийиэк тутуллара уолдьаспытын эттэ. Итини сэргэ нэһилиэк олохтоохторо соҕуруу сытар нэһилиэктэр суолларыгар улахан өрөмүөн үлэтин тэрийэргэ биир санаанан туруорустулар. Хоптоҕолор Бырабыыталыстыба отчуотун истэн баран, үлэни-хамнаһы сөптөөҕүнэн сыаналаатылар.
Анна Захарова.