Хатылы нэһилиэгин “Ньургуһун” уһуйааныгар дьиэ кэргэн күнүгэр анаммыт олус сэргэх тэрээһин ыытылынна. Сарсыардаттан уһуйаан бырааһынньыктыы киэргэтиллэн кырачааннары уонна төрөппүттэри үөрэ көрүстэ. Үөрүүлээх тэрээһиҥҥэ оҕолор дьиэ таһыгар тардыллыбыт салама таһыгар иитээччилэр арчыларынан ыраастанан, уһуйааннарыгар киирдилэр.
Истиҥ эбээлэр сылаас алаадьынан айах тутан көрүстүлэр. Владимировтар дьиэ кэргэн хас биирдии оҕоҕо дьиэ кэргэн халандаарын утары ууннулар. Кэлбит оҕолор төрөппүттэринээн баҕа санаа бастыҥын санаан, хатыҥҥа салама ииллилэр.
Эбээлэр дьиэ кэргэн күнүнэн эҕэрдэлээн туран “Доруобай аһылык —доруобай оҕо” тиэмэҕэ саха төрүт аһын араас көрүҥүнэригэр маастар-кылаастары ыыттылар. Аныгылыы суорат, утах, иэдьэгэйтэн сыр, көбүөрдээх лэппиэскэ, балыктан торт, хортуоппуйтан бүлүүдэ, чооску төбөтүттэн халадьыас, сүөһү төбөтүттэн кэнсиэрбэ уо. д .а. солун бүлүүдэлэр көрдөрүлүннүлэр.
“Уһуйаан иитиллээччилэрэ “Дьиэ кэргэн” диэн суруйан киэргэппит тортарынан уонна доруобуйа утаҕынан ыалдьыттары күндүлээтилэр. Эбээлэр түмсүүлэрин салайааччыта Варвара Дмитриевна Хатылы нэһилиэгин дьиэ кэргэттэрин урукку үлэтин кэпсээбитин, 50 сыл бииргэ олорбут дьиэ кэргэттэргэ буклет таһаарбытын сэҥээрэ иһиттибит.
Инникитин маннык дьаһаллары өссө кэҥэтэн ыытарга, эбээ түмсүүтүн кытта өссө солун идеялары киллэрэн бииргэ үлэлииргэ сүбэлэһэн тарҕастыбыт. Хатылыбыт кэнчээри ыччаттарын уйгуларын уруйдаан бүгүҥҥү күммүт ардаҕынан арчылаата”, — диэн уһуйаан сэбиэдиссэйэ Татьяна Ефремова кэпсээтэ.
Сэмэн Жендринскэй