Хайахсыт нэһилиэгиттэн төрүттээх, СӨ Ил Түмнэ дьокутаата Дмитрий Поисеев, улуус мунньаҕын дьокутаата Егор Анемподистов, оскуола тутуутугар үлэлэспит Аркадий Лукин, Геннадий Васильев көҕүлээһиннэринэн биирдиилээн уонна хамаанданан бастыыр иһин куйуур күрэҕэ кулун тутар 16 күнүгэр Кэтит Күөл эбэҕэ бэрт тэрээһиннээхтик ыытылынна.
—Бэйэбит нэһилиэкпититтэн уонна Хадаартан барыта 6 хамаанда кэлэн көхтөөхтүк кытынна. Икки чаас устата куйуурдааһыҥҥа, салгыы бириэмэҕэ ойбону алларыыга хамаанданан уонна биирдиилээн дьон күөн көрүстүлэр.
Быйылгы тэрээһиммит уратытынан оскуола оҕолоругар 14-гэр уонна 17-гэр диэри куйуур күрэҕэ киирбитэ буолла. Ыччаттарбыт төрүт дьарыкпытын баһылыылларыгар олус туһалаах саҥа сүүрээн буолла, сылын ахсын кэҥэтэн кыттааччытын ахсаанын эбэр соругу бэйэбит иннибитигэр туруорабыт.
Түмүккэ хамаанданан куйуурга күрэххэ бастакы миэстэҕэ Роберт Поисеев, Айаал Тимофеев, Виктор Ксенофонтов, иккискэ Владислав Поисеев, Дмитрий Неустроев, Таман Поисеев уонна үһүскэ Хадаар хамаандалара таҕыстылар.
Улахан дьоҥҥо ойбону алларыыга 1 миэстэ Захар Лукин, 2 миэстэ Михаил Поисеев, 3 миэстэ Болот Илларионов буоллулар. Онтон оҕолорго ойбону алларыыга 1 миэстэ Коля Бандеров, 2 миэстэ Хадаартан Владик Давыдов, 3 миэстэ Роберт Поисеев. Саамар кыра куйуурдьутунан 6 кылаас үөрэнээччитэ Миша Ксенофонтов ааттанна. Саамай улахан собону туппут куйуурдьутунан Виктор Ксенофонтов буолла.
Бу курдук төрүт дьарыкпытын харыстаан, өрө тутан илдьэ сылдьыаҕыҥ, ыччаттарбытыгар тиэрдэн олоххо бэлэмнээх, дьоһун дьон буолан тахсалларыгар маннык тэрээһиннэри үксэтэ, тэнитэ туруоҕуҥ! — Афанасий Илларионов аатынан Хайахсыт орто оскуолатын учуутала, “Үрүҥ Уолан” БПК салайааччыта, быйылгы куйуур күрэҕин призера Михаил Поисеев иһитиннэрдэ.
Сэмэн Жендринскэй