Ааспыт нэдиэлэҕэ, Хадаар нэһилиэгэр тохсунньу 26-27 күннэригэр, оскуола оҕолоругар аһаҕас өрөспүүбүлүкэтээҕи мас тардыһыы күрэҕэ буолан ааста. Сахабыт сирин араас муннуктарыттан барыта холбоон 273 ыспарсымыан, 37 тириэньэр, Олоҥхо дойдутунан сураҕырбыт Сунтаар оройуонуттан тиийэ — 11 улуус эдэркээн эрэллэрэ кэлэннэр күөн көрүстүлэр.
Манна аар-сааргы аатырбыт, өрөспүүбүлүкэбитигэр мас тардыьыытын, Саха төрүт успуордун көҕүлээччилэр Уйбаан Белолюбскай, биир дойдулаахпыт Иннокентий Макаров курдук бас-көс дьоммут кэлэннэр ыалдьыттаан, күрэхтэһиибитин киэргэтэн, таһымын үрдэтэн, эдэр ыспарсымыаннар санныларыгар кынат анньан бардылар.
Уопсай түмүккэ, 5 кыһыл көмүс, 2 үрүҥ көмүс, 2 боруонса мэтээллээх, мадьынылар төрөөбүт дойдуларынан сураҕырбыт Уус Алдан улууһун хамаандата итэҕэтиилээхтик кыайыылаах буолла. Иккис миэстэҕэ 4 кыһыл көмүс, 3 боруонса мэтээллээх ыаллыы сытар Таатта улууһун мадьынылара онтон үһүс бочуоттаах миэстэҕэ 3 кыһыл көмүс, 5 үрүҥ көмүс, 6 боруонса мэтээллээх Чурапчыбыт улууһун кэскиллээх мадьынылара буолары ситистилэр.
Итини таһынан, 40 уонна 70 киилэҕэ диэри ыйааһыннаах уолаттарга муҥутуур кыайыылааҕы быһаарар күрэххэ, Тихон Каженкин аатынан Арыылаах орто оскуолатын дириэктэрэ Егор Германович Егоров, убаһа аҥардыытын туруоран тыҥааһыннаах киирсилэр дьэ манна буоллулар.
Түмүккэ, 40 киилэҕэ диэри ыйааһыннаах уолаттарга Семен Флегонтов аатынан Хадаар орто оскуолатын 7-с кылааһын үөрэнээччитэ Петя Герасимов муҥутуур кыайыылаах тахсан убаһа аҥарын дойдутугар хаалларда. Онтон 70 киилэттэн үөһэ ыйааһыннаах мадьыныларга, Таатта улууһуттан Айтал Винокуров кими даҕаны илиилээх-атахтаах оҥорбокко, убаһа иккис аҥарын дойдутугар сүгэн барда.
Тэрийээччилэр түгэнинэн туһанан, сүрүн успуонсардарыгар “Прогресс” ХЭТ генеральнай дириэктэрэ Алексей Пинигиҥҥэ, “Чурапчы” ТХПК дириэктэрэ Алексей Егоровка, улуус баһылыгар Степан Саргыдаевка, нэһилиэк баһылыгар Афанасий Степановка, Чурапчытааҕы судаарыстыбаннай физкултуура уонна успуорт үнүстүүтүн ректора Иннокентий Готовцевка, улуус үөрэҕин управлениетын начаалынньыга Юрий Посельскайга, улуустааҕы мас тардыһыы бэдэрээссийэтигэр, биир дойдулаахтарыгар, Хадаар нэһилиэгин бары тэрилтэлэригэр, урбаанньыттарга дириҥ махталларын тириэрдэллэр.
Чурапчы – бу успуорт туоната! Оҕо успуорда — инники кэскилбит!
Сэмэн Жендринскэй