Муус устар 23-25 күннэригэр, Москуба куорат “Космос” ГК конгресс-киинигэр “Наукаҕа бастакы хардыылар” диэн XXXIII-с төгүлүн ыытыллар айар-тутар уонна начнай-чинчийэр үлэлэргэ Бүтүн Арассыыйатааҕы оҕолор куонкурустара түмүктэннэ.
Манна Чурапчы улууһуттан Степан Макаров аатынан Чурапчы гимназиятын, Семен Новгородов аатынан Чурапчы орто оскуолатын уонна Иван Федосеев-Доосо аатынан Дириҥнээҕи агро-оскуола үөрэнээччилэрэ тиийэннэр кыттыыны ыллылар.
Чуолаан буойун-учуутал Степан Кузьмич Макаров аатынан Чурапчытааҕы гимназия үөрэнээччилэрэ ордук чорбойдулар. Ол курдук, РФ үтүөлээх учуутала, “СӨ Учууталларын учууталлара” бэлиэ хаһаайына, улууспут биир киэн туттар учуутала Мария Иустиновна Хоютанова салайааччылаах гимназия 8-с кылааһын үөрэнээччитэ Коля Собакин “Технологии и техническое творчество” диэн хайысхаҕа 1-кы степеннээх дипломунан итиэннэ “Арассыыйа наукатын инникитэ” диэн чинчийэр уонна бырайыактыыр үлэҕэ үрдүк ситиһиитин иһин мэтээлинэн наҕараадаланна.
Кытаанах нэһилиэгиттэн силистээх-мутуктаах, учууталлар династияларын удьуор сыдьаана, улууска 100 бааллаах выпускнигы бэлэмнээбит Прокопий Прокопьевич Захаров иитиллээччитэ, гимназия 6-с кылааһын үөрэнээччитэ Кузьма Артемьев “Информационные технологии, математика” хайысхаҕа эмиэ 1-кы степеннээх диплому ылары ситистэ итини таһынан салайааччытыгар Прокопий Прокопьевичка, Бүтүн Арассыыйатааҕы куонкурус призерун бэлэмнээбитин иһин диплому туттардылар.
“Биһиги улууспут, гимназиябыт үөрэнээччилэрин, научнай салайааччыларын ситиһиилэринэн олуһун киэн туттабыт. Элбэх үлэ өссө даҕаны сурулла сылдьар, учууталлар үөрэнээччилэрин бэлэмниир таһымнара үрдүк. Ситиһиилэр өссө даҕаны кэлэ туралларыгар баҕарыллар. Колялаах Кузьмаҕа үөрэхтэригэр ситиһиини, төрөппүттэригэр бэйэбит үөрэхпит кыһатыттан туспа махталбытын биллэрэбит”, — диэн гимназия дириэктэрин научнай үлэҕэ солбуйааччы, педагогическай билим хандьыдаата, СӨ үтүөлээх учуутала Ирина Соловьева эттэ.
Сэмэн Жендринскэй