Хатылы олохтоохторо ФЛГ-га уонна маммографияҕа түстүлэр. Олохтоохтор маннык көһө сылдьар комплекс кэлбитин үрдүктүк сыаналаатылар, түргэнин, хаачыстыбалааҕын уонна миэстэтигэр кэлэн түһэрэрин астына бэлиэтээтилэр.
Комплекс ПАЗ автобус базатыгар оҥоһуллубут, Чурапчытааҕы киин балыыһаҕа «Доруобуйа харыстабылын бастакы олугун модернизациялааһын» бырагырааманан кэлбитэ.
Комплекс нэһилиэнньэни миэстэтигэр тахсан көрүөҕэ, тыҥа уонна түөс ыарыыларын буларга көмөлөһүө. Рентгент түһэриитин ойуута чуолкай буолан, ыарыыны эрдэтинэ билэр кыахтаах.
Бэлиэ түгэни түстээн, алгыс сиэрэ-туома ыытылынна. Манна улуус баһылыгын тутууга уонна архитектураҕа солбуйааччыта Афанасий Дьячковскай, Хатылы нэһилиэгин баһылыга Вячеслав Попов, кылаабынай быраас Николай Сивцев, кини солбуйааччыта Александр Максимов кыттыыны ыллылар.
Кылаабынай быраас Николай Сивцев Ил Дархаҥҥа Айсен Николаевка, СӨ Бырабыыталыстыбатыгар, Доруобуйа харыстабылын миниистиригэр Лена Афанасьеваҕа Чурапчы доруобуйатын харыстабылыгар болҕомтолорун, кыһамньыларын иһин махтанна.
Елена Макаринская