Өрөспүүбүлүкэтээҕи 2 №-дээх балыыһа-Мэдиссиинэ Суһал кииниттэн Зураб Саакян салайааччылаах хирурдар биригээдэлэрэ бэс ыйын 6 күнүттэн, икки нэдиэлэ устата, Чурапчы улууһугар кэлэн үлэлээтэ. Туһааннаах ыарыһахтары көрсөн сүбэни-аманы биэрдилэр, араас көрүҥ эпэрээссийэлэри оҥордулар, олохтоох быраастарга маастар — кылаас ыыттылар.
СӨ Доруобуйаҕа харыстабылын министиэристибэтэ СӨ Ил Дархана Айсен Николаев Анал этиитин олоххо киллэрэн, «Мобильнай хирургическай киин» диэн саҥа бырайыагы киллэрбитэ. Ол чэрчитинэн хирурдар биригээдэлэрэ быйыл номнуо 9 улууска үлэлээтилэр.
«Кэлиэхпититтэн уопсайа 215 киһини көрдүбүт, 63 араас көрүҥ эпэрээссийэни оҥордубут. Мин 7 киһиэхэ иэччэх сүһүөҕэр протез оҥордум, отоларинголог быраас 30 киһи муннун эпэрээссийэлээтэ, проктолог — бырааска көрдөрүнэн, 19 киһи геморройун быстарда. Тымыр бырааһа бу соторутааҕыта кэлэн 7 ыарыһах варикоһун эпэрээссийэлээтэ. Бу 9-с оройуоммутугар үлэлээтибит. Салгыы Алдаҥҥа онтон Намҥа барабыт», — диэн травматолог-ортопед Айаал Винокуров үллэстэр.
Чурапчы улууһун кылаабынай бырааһын солбуйааччы, травматолог-ортопед быраас Александр Максимов: “Хирурдар мобильнай биригээдэлэрэ Чурапчы улууһугар кэлэн үрдүк таһымнаах араас көрүҥ эпэрээссийэлэри оҥордо. Үксүгэр бэйэбит хирурбут Илья Оконешников уонна мин сүһүөҕү уларытыы эпэрээссийэтигэр көмөлөһөн, көрөн-истэн уопут ыллыбыт. Өрөспүүбүлүкэтээҕи 2 №-дээх балыыһа травматолог-ортопед бырааһа Айаал Винокуров сүрдээх түргэнник, сатабыллаахтык эпэрээссийэлэрин оҥорон биһиэхэ маастар-кылаас көрдөрдө”, — диэн кэпсиир.
«Мин иэччэҕим сүһүөҕүн эпэрээссийэлэттим. Уочарата суох көрбүтүнэн бараллар эбит. Чааһы кыайбатынан, 40-45 мүнүүтэнэн оҥорон бүтэрэн, палаатаны булларбыттара. Эпэрээссийэ кэнниттэн 4 күнүнэн олорорго-турарга, баттыгынан хаамарга үөрэнэн, уопсай туругум үчүгэй. Маннааҕы олохтоох үлэһиттэрбит күн аайы кыһамньылаахтык көрөн-истэн бүөбэйдииллэр. Куораттан кэлбит быраастарга, кинилэр салалталарыгар, бэйэбит улууспут киин балыыһатын салалтатыгар, үлэһиттэригэр улахан махталбытын тиэрдэбит», — диэн Болугур нэһилиэгин олохтооҕо Николай Федотов этэр.
«Үйэм — сааһым тухары балыыһа диэни кэрийбэтэх, эмтэммэтэх киһи былырыын, быйыл биирдиитэ уһун айаҥҥа айаннааммын өттүгүм уҥуоҕа күүскэ ыалдьан балыыһаны булбутум. Куораттан мобильнай биригээдэ кэлбит кэмигэр түбэһэн, өттүгүм уҥуоҕун оҥортордум. Сааһым тухары намыһах өттүктээх сылдьыбыт киһи билигин өттүгүм тэҥнэһэн үөрэн сытабын. Үчүгэй буоларыгар улахан эрэллээхпин. Улууспут балыыһата кэҥээн, көрдөрүнэргэ, эмтэнэргэ толору усулуобуйа тэриллибит. Мобильнай биригээдэ манна, миэстэтигэр кэлэн оҥорбута сатаан ыраах айаннаабат тыа дьонугар бары өттүнэн эргиччи олус туһалаах. Бэйэлэрин идэлэрин толору баһылаабыт, бэриниилээх эдэр исписэлиистэр кэлбиттэр. Бары түргэннэрэ-тарҕаннара, кыайаллара-хотоллоро сүрдээх. Олус элбэх киһи туһанна, инньэ гынан наһаа астынабыт, үөрэбит уонна махтанабыт. Олохтоох бэйэбит медиктэрбитигэр, Дьокуускайтан кэлбит мобильнай биригээдэҕэ ситиһиилээх үлэни-хамнаһы баҕарабыт, дьон-сэргэ махталын ыла туруҥ!», — диэн Хоптоҕо нэһилиэгин олохтооҕо Анна Иванова үллэстэр.
Дьон-сэргэ доруобуйатын тупсарыыга туһуламмыт саҥа бырайыак эмтэнээччигэ, ханна олороруттан тутулуга суох мэдиссиинэ анал көмөтө чугаһыырыгар, табыгастаах буоларыгар үлэлиир.
Людмила Горохова.
Наталья Сибирякова видеоҕа устуута.