Бэҕэһээ, Саха Өрөспүүбүлүкэтин күнүгэр, Чурапчы нэһилиэгин “Утум” дьиэтин “Алгыс” бэтэрээннэрин хора уонна үҥкүү бөлөхтөрө Төлөй нэһилиэгин бэтэрээннэрин кытта кытта доҕордуу көрсүһүүлэрэ Төлөйгө буойун-суруналыыс Алексей Бродников аатынан “Аартык” НАДь-гэр ыытылынна. Бу көрсүһүүнү “Утум” дьиэтин салайааччыта Анна Петрова уонна Төлөй нэһилиэгин бэтэрээннэрин Сэбиэтин бэрэссэдээтэлэ Николай Захаров салайан, иилээн-саҕалаан ыыттылар.
Сахалыы сиэдэрэй таҥастаах Төлөй далбар хотуттара кэлбит ыалдьыттары сылаас саламаатынан, арыылаах алаадьынан үөрэ-көтө көрүстүлэр.
Өрөспүүбүлүкэбит бэлиэ күнүн, доҕордоһуу дьоро көрсүһүүнү бары сахалыы флешмоб үҥкүүлээн саҕалаатыбыт. Кэлбит ыалдьыттары уонна олохтоохтору “Төлөй” нэһилиэгин МТ баһылыга Игорь Николаев эҕэрдэлээтэ уонна бэйэ–бэйэҕэ умнуллубат түгэннэри бэлэхтииргэ баҕа санаатын тириэртэ. Салгыы остуол тенниһигэр, дартска, сахалыы хабылыкка, хаамыскаҕа күрэхтэр саҕаланнылар. Бэлиэтээн эттэххэ, Төлөйтөн бу успуорт көрүҥнэригэр ситиһиилээх, биллэр ыспарсымыаннар бааллар. Ол курдук хабылыкка, Үөһээ Бүлүүгэ улууһугар ыытыллыбыт Олоҥхо ыһыаҕар бастаабыт, өрөспүүбүлүкэ чөмпүйүөнэ Алексей Васильев, остуол тенниһигэр өрөспүүбүлүкэҕэ күрэхтэспит, биһиги улууспут чиэһин көмүскээбит Александра Сысолятина оҕолорго теннис күрэхтэһиитин төрдүс сылын ыытар, былырыын улахан дьоҥҥо тэрийбитэ. Парасковья Христофорова сахалыы хабылыкка, хаамыскаҕа оскуола оҕолорун утумнаахтык дьарыктыыр, Төлөйгө, бу успуорт көрүҥэр улуустааҕы, өрөспүүбүлүкэтээҕи күрэхтэр, оскуола дириэктэрэ, төрүт оонньууларга СӨ успуордун маастара Андрей Деллохов быһаччы өҥөтүнэн ыытыллалларын туһунан Николай Константинович Захаров үөрэ-көтө кэпсээтэ.
Күрэхтэһиилэр түмүктэрин иһитиннэрдэххэ, дарт көрүҥэр 1 миэстэ – Иван Пермяков (Чурапчы), 2 миэстэ — Анна Петрова (Чурапчы), 3 миэстэ – Прасковья Христофорова (Төлөй). Остуол тенниһигэр дьахталларга 1 миэстэ – Прасковья Христофорова (Төлөй), 2 миэстэ – Александра Сысолятина (Төлөй), 3 миэстэ – Розалия Трофимова (Чурапчы). Хабылыкка-хаамыскаҕа 1 миэстэ – Прасковья Христофорова (Төлөй), 2 миэстэ – Анастасия Емельянова (Төлөй), 3 миэстэ – Екатерина Попова (Төлөй).
Саха балаҕаныгар туой оҥоһукка маастар кылааһы “Талба” түмсүү салайааччыта Наталья Егоровна Гуляева ыытта. Балаҕан наһаа истиҥ эйгэлээх, киирбит киһи кутун сылааһынан илгийэр тыыннаах буолан биэрдэ. Саҥа тутуу өссө Николай Иннокентьевич Аммосов баһылыктыы олордоҕуна үлэҕэ киирбитэ. Былырыын күһүн баһылык Игорь Владимирович Николаев эбии пристрой туттаран, ититии киллэттэрэн олохтоохтор биир түмсэр сирдэрэ буолбута. Манна оскуола оҕолоруттан саҕалаан аҕам саастаах дьон кэлэннэр дьарыктаналлар, маастар кылаастарга сылдьаллар.
Маны барытын Наталья Егоровна сүрүннүүр, туойга эбии үөрэхтэри ыытар. Кинилэр үлэлэрин билсиһэ Чурапчыбыт нэһилиэктэриттэн, атын улуустартан кытары кэлэллэр эбит. Биһиги манна сылдьан туойунан бастакы оҥоһуктарбытын оҥорон наһаа астынныбыт. Кырдьык киһини уоскутар, киһи доруобуйатыгар да туһалаах дьарык эбит. Наталья Егоровна бэйэтэ сүрдээх үчүгэйдик сырдатан кэпсээтэ.
Киэһээ икки нэһилиэк бэтэрээннэрин кэнсиэрэ буолла. Кэнсиэри СӨ култууратын үтүөлээх үлэһитэ Надежда Заболоцкая иилээн ыытта. “Алгыс” бэтэрээннэр хордара, Аграфена Кузьмина, Борис Васильев, Наталья Захарова ылбаҕай ырыаларын, Наталья Устинова хомус дьүрүскэн тойугун, “Сардаҥа”, “Туналы”, “Иэйии” үҥкүү бөлөхтөрө кэрэ үҥкүүлэрин көрөөччүлэргэ бэлэхтээтилэр. Ити курдук икки нэһилиэк бэтэрээннэрэ, үлэни өрө тутан кэлбит кырдьаҕастарбыт, билигин да олоххо көхтөөх сыһыаннаах дьоммут куруук холобурга сылдьаллар. Биһигини илдьэ сылдьыбыт суоппарбытыгар Артем Васильевка махталбытын тиэрдэбит.
Наталья Захарова – РФ суруналыыстарын Сойууһун чилиэнэ
Бэлэмнээтэ Сэмэн Жендринскэй