Эрилик Эристиин аатынан сопхуоска бастыҥ үлэлээх механизатордар ахсааннара сылтан сыл элбээн иһэрэ. Оччотооҕуга сопхуос производстватыгар тиэхэньикэни көдьүүстээхтик туһаныы бэрт элбэҕи быһаарара.
Сопхуос биир бастыҥ механизаторынан, бастатан туран, Егор Григорьевич Родионов аата ааттанара. Кини 12-13 саастааҕыттан колхуос производстватыгар сыралаһан үлэлээбитэ. Үлэһит буолар киһи оччоттон олус кыһамньылаах, сүрэхтээх этэ уонна табаарыстара тугу этэллэрин үөрбүт-көппүт курдук улгумнук толорон иһэрэ. Кэлин үлэҕэ улам эриллэн истэҕин ахсын хоннохтоох үлэһит быһыытынан биллэн испитэ. Ити сырыттаҕына колхуоска тыраахтырдар кэлэн барбыттара. Егор ити тимир көлө уруулун тутуон олус баҕарара. Ону сэрэйбит курдук колхуоһун салалтата 1952 сыллаахха бастыҥ ыччаттартан талан, ол иһигэр Егору тырахтарыыстар биир сыллаах үөрэхтэригэр ыыппыта. Кини итиннэ сылдьан тиэхэньикэ кистэлэҥин үчүгэйдик үөрэппитэ уонна тыраахтыры ыытар быраабы ылан колхуоһугар эргиллибитэ.
Тыраахтыр уруулугар олорон үлэлээтэҕин бастакы күннэриттэн таһаарыылаахтык, дьулуурдаахтык үлэлээн дьонун эрэллэрин чиэстээхтик толорбута. Егор Григорьевич тыраахтырын мэлдьи көрөр–истэр, өрөмүөннүүр буолан алдьанан турууну таһаарбатаҕа.
1974 сыллаахха 2500 эталоннай гектарга тэҥнэһэр үлэни толорорго эбэһээтэлистибэ ылынар. Ону 2784 гектарынан толорбута. Сири хорутууга оройуон механизатордарын күрэхтэһиилэригэр Егор Григорьевич чөмпүйүөн бочуоттаах аатын ылбыта.
Уопуттаах тырахтарыыс ситиһиитин сүрүн кистэлэҥинэн тиэхэньикэ саахалланыытын таһаарбатын сэргэ үлэ күнүн муҥутуурдук туһанара, атыннык эттэххэ, сарсыарда эрдэлээн, киэһэ хойукка диэри үлэлиирэ. Кэлиҥҥи уонча сыл устата былаанын толорботох дьыла диэн суоҕа. 1975 сыл тоҕус ыйын түмүгүнэн 1695 эталон гектарга тэҥнэһэр үлэни толорбута.
Егор Родионов 1961 сылтан ССКП чилиэнэ. Бэйэтин өр сыллаах үлэтин уопутугар үгүс эдэр ыччаттары үөрэппитэ. Оройуоннааҕы XXIV-с партийнай кэмпириэнсийэҕэ Егор Григорьевич сопхуоһун хомуньуустарын үрдүк итэҕэллэрин сүгэн дэлэгээт быһыытынан кыттыбыта уонна оройуонун экэниэмикэтэ, култуурата салгыы сайдар сүрүн соруктарын быһаарсыбыта. Кэлин, тохсус пятилетка бүтэһик күннэригэр ыраах Мэлдьэхси учаастагар уопсастыбаннай сүөһүгэ оту тиэйиигэ таһаарыылаахтык үлэлээбитэ. Кини биир сүрүн соругунан сүөһү аһылыгын саппааһын дэлэччи таһыы уонна баартыйа учуораттаах XXV-с сийиэһин бэлэхтээх көрсүү буолбута.
Коммунистическай үлэ удаарынньыга Егор Григорьевич Родионов “Үлэҕэ килбиэнин иһин В.И. Ленин төрөөбүтэ 100 сыла туолуутун бэлиэтээн” үбүлүөйүнэй мэтээлинэн уонна хас да бочуотунай грамоталарынан наҕараадаламмыта.
Онус пятилетка сылларыгар кырдьаҕас механизатор өссө үрдүктүк, таһаарыылаахтык үлэлииргэ соруктаммыта.
Сэмэн Жендринскэй