Чурапчытааҕы саастарын ситэ илик оҕолору чөлүгэр түһэрэр судаарыстыбаннай тэрилтэ бу сыл ахсынньы ыйтан үлэлиир хайысхатын кэҥэтэн, Дьиэ кэргэҥҥэ элбэх өҥөнү оҥорор киин быһыытынан үлэтин саҕалыаҕа.
Чуолаан, оҕолоох бары ыаллары, доруобуйаларыгар хааччахтаах оҕолору, аҕам саастаах дьону кытары ситимнээх үлэни тэрийиэхтээхпит. Бу өрөспүүбүлүкэҕэ саҥа бастакы бырайыак Российскай Федерация Үлэҕэ Министиэристибэтин көҕүлээһининэн тэриллэн, ыарахан балаһыанньаҕа түбэспит оҕолорго аналлаах Пуонда үбүлээһининэн аһыллар. Пуонда куонкурус биллэрбитигэр, биһиги тэрилтэбит бырайыак суруйан, 4.987.000 солк суумалаах граны ылары ситиспиппит. Киин сыала-соруга – оҕолоох ыал олоххо көрсөр күннээҕи ыйытыктарын, кыһалҕаларын быһааран, биир сиргэ миэстэтигэр тута туһалаах көмөнү, өйөбүлү оҥоруу. Манна социальнай, педагогическай, психологическай , медицинскэй, бытовой уонна да атын үлэ өҥөтө босхо оҥоһуллар.
Дьиэ кэргэҥҥэ элбэх өҥөнү оҥорор кииммит 3 отделениелаах. Бастакы отделениебыт кэлбит дьону көрсөн-кэпсэтэн, туох көмөҕө наадыйарын быһаарыы уонна тустаах исписэлиистэргэ анаан тута көмөнү оҥорорун тэрийии буолар. Кыһалҕата дириҥ буоллаҕына, иккис отделениеҕа, психолог консультациятыгар, сүбэтигэр сырытыннарар эбэтэр мобильнай сулууспа бу ыалы кытары боппуруоһа быһаарыллыар диэри ситимнээхтик үлэлиир. Үһүс отделениеҕа ыҥырыллан кэлбит исписэлиистэр анал түннүктэргэ олорон, оҕолоох ыаллары кытары биирдиилээн кэпсэтиэхтэрэ, аадырыстаах көмөнү туһаайыахтара. Манна биһиги тэрилтэбитин кытары дуогабардаһан, анал исписэлиистэр социальнай харалта, дьарыктаах буолуу киинэ, балыыһа, үөрэх управлениета, социальнай пуонда, ыччаты уонна дьиэ кэргэни кытары үлэлэһэр психологическай киин, опека уонна попечительство отдела, улуус дьаһалтатын дьиэ кэргэни кытары үлэлиир отдел, полиция отдела графигынан кэлэн, докумуоннары тутуохтара, консультация, быһаарыы биэриэхтэрэ. Маны таһынан, психолог анал сенсорнай кабинета үлэлиэҕэ, санааҕа ылларбыт киһи тест, тренинг көмөтүнэн ис туругун бөҕөргөтүүгэ, инники олоҕор көмөнү ылыаҕа.
Доруобуйаларынан хааччахтаах оҕолорбут төрөппүттэрин кытары кэлэн, туруктарын чөлүгэр түһэрэр аппараттар нөҥүө дьарыктанар кыахтаныахтара, кинилэргэ аналлаах туспа кабинет уонна исписэлиис үлэлиэҕэ. Ону таһынан, күнүһүн оҕо ийэтинээн эбэтэр чугас киһитин кытары күнүскү стационарга «Бэйэни көрүнүү, олоххо үөрэнии» диэн анал дьарыгы барыахтарын сөп.
Аҕам саастаах дьоммутугар эмиэ туспа көрсүһүүлэр, дьарыктар ыытыллыахтара. Сааһырдым, кэлэр-барар ыарахан диэн өйдөбүлтэн тахсыыга уонна уһун үйэлэниигэ сүбэлэри, маастар-кылаастары, хамсаныылары, сэминээрдэри, араас дьаһаллары былаанныыбыт.
Биһиги «Дорожник» тэрилтэ үлэлээн олорбут этээстээх таас дьиэтигэр көһөөрү, өрөмүөн үлэтин тэрийдибит. Миэбэл, оборудование, техническэй тэриллэр барыта сакаастанан тураллар. Дьиэбит аныгылыы тупсаҕай көрүҥнээх буолуоҕа, кэлбит киһи «Госуслуги» , «Е — Якутия», уонна да атын саайтарга киирэр, үлэлиир усулуобуйата барыта тэриллиэҕэ. Оҕолоох дьиэ кэргэни кытта туһааннаах көмөнү тэрийэр кэммитигэр, оҕолорго аналлаах оонньуур былаһаакка, сайыннарар, аралдьытар анал хос үлэлиэҕэ.
Ытыктабыллаах улууспут олохтоохторо! Бу саҥа аһыллаары турар элбэх өҥөнү оҥорор кииммитигэр эһигини өрүүтүн кэтэһэбит, ыҥырабыт. Судаарыстыба тэрийэр көмөтүнэн табатык туһанан, хас биирдии ыал олоҕо тубустун, бары инникигэ эрэллээх буолуоҕуҥ!
Мария Саввина, киин дириэктэрэ