Былыр-былыргыттан ынах, сылгы иитиитинэн дьарыктаныы саха норуотун матырыйаалынай култууратыгар, кини прикладной ускуустубатыгар дьоһуннаах суолу-ииһи хаалларбыттара. Биир оннук оҥоһугунан сөрүө буолар.
Оройуоҥҥа 70-90-с сылларга сөрүө өрүүтүгэр биллэр маастарынан Евдокия Семеновна Пинигина буолара. Кини бу сэдэх уонна мындыр идэҕэ Хадаар Уорҕатыгар олорбут эбэтиттэн, кэлин кэргэнин аймахтара Дьячковскайдартан үөрэммитэ. Бастакы сөрүөтүн 30-с сыллар бүтүүлэригэр өрбүтэ. Оттон бэттэх кини имигэс илиитинэн таҥан араас бэйэлээх дьэрэкээн сөрүөлэри оҥорбута.
Талааннаах маастар – оройуоннааҕы көрүү быыстапка лауреата этэ. Ону ааһан икки бастыҥ оҥоһуга өрөспүүбүлүкэҕэ көрдөрүллүбүттэрэ, онно үрдүк сыанабылы ылан Уһук Илин уонна Уһук Хоту сир норуоттарын оҥоһуктарын быыстапкатыгар Хабаровскай куоракка ыытыллыбыттара.
Евдокия Семеновна кэрэҕэ тардыһыыта кини бэһиэ оҕотуттан иккитигэр бэриллибитэ. Уола Иван Семенович СӨ култууратын туйгуна, биллэр дуоматчыт, кыыһа Акулина ускуустуба анал үөрэхтээхтэрэ.
Акулина Семеновна Кривошапкина ону сэргэ уран тарбахтаах, ийэтин утумнаан сөрүөнү өрүүнэн ситиһиилээхтик дьарыктанан Аан дойду быыстапкаларын кыттыылааҕа, норуот маастара, сөрүөһүт этэ.
Оттон кини улахан кыыһа Мария Рехлясова, РФ худуоһунньуктарын Сойууһун чилиэнэ, Намнааҕы педколледж преподавателэ, уратын уран оҥоһуулаах сөрүөһүт,
Акулина Семеновна кыра кыыһа Варвара Кривошапкина элбэҕи эрэннэрэр талааннаах сөрүөһүт. Онон утум салҕанар.
70-с сыллар бүтүүлэригэр ыытыллыбыт фольклор бэстибээлин зонатааҕы көрүүгэ Евдокия Семеновна икки үлэтинэн биһиги оройуоммун чиэһин ситиһиилээхтик көмүскээбитэ. Кини 1985 сыллаахха “Сэбиэскэй Илин Уһук” зональнай быыстапкаҕа 1-кы степеннээх дипломант, ити сыл Монголияҕа норуоттар икки ардыларынааҕы быыстапка кыттыылааҕа, 1986 сыллаахха Ялта куоракка буолбут Бүтүн Сойуустааҕы норуот оҥоһуктарын быыстапкатыгар анал дипломунан наҕараадаламмыта, 1987 сыллаахха Москуба куоракка ыытыллыбыт Бүтүн Сойуустааҕы норуот оҥоһуктарын бэстибээлигэр СССР худуоһунньуктарын Сойууһун грамотатынан бэлиэтэммитэ, 1990 сыллаахха Дьокуускай куоракка Бүтүн Арассыыйатааҕы Хотугу норуоттар быыстапкаларын лауреата, 1992 сыллаахха Красноярск куоракка “Сибиир дьаарбаҥката” эрэгийиэннээҕи быыстапкаҕа кыһыл көмүс мэтээли ылары ситиспитэ итиэннэ 1997 сыллаахха “Удьуор Уус” өрөспүүбүлүкэтээҕи быыстапка 1 степеннээх димпломана. Биллэр норуот маастарын үлэлэрэ көһө сылдьар Арассыыйа быыстапкаларыгар ону тэҥэ Монголияҕа, Японияҕа, Кэриэйэҕэ, Франция туруоруллубуттара.
Евдокия Семеновна үлэлэрэ билигин Емельян Ярославскай аатынан Дьокуускайдаааҕы судаарыстыбаннай мусуой пуондатыгар, национальнай художественнай мусуойга, Өндөрүүскэ Саабын аатынан Чурапчытааҕы кыраайы үөрэтэр уонна этнография мусуойугар, Ленинград куораттааҕы этнография мусуойугар хараллан сыталлар.
Сэмэн ЖЕНДРИНСКЭЙ