Иван Иванович Сергеев кыра эрдэҕиттэн үлэҕэ эриллэн, кини бары ымпыгын-чымпыгын, мындырын сыыйа билэн испитэ. Кэлин үөрэнэн истэҕин ахсын эдэр уол бастыҥнар кэккэлэригэр киирбитэ. Ол да иһин коммунистическай үлэ удаарынньыгын бочуоттаах аатын нэһилиэгэр бастакынан кини ылбыта.
Бэйэтэ кэпсээбитинэн, кини олоҕун саамай дьоллоох сылынан 1961 сыл буолар – ити дьыл кини Сэбиэскэй Сойуус Коммунистическай баартыйатын кэккэтигэр чилиэнинэн киирбитэ. ССКП чилиэнэ буолуу кинини үгүскэ эбээһинэстээбитэ. Аҥардас бэйэ үлэтин эрэ иһин буолбакка, аны кэлэктиип үлэтин, олоҕун бүтүннүүтүн иһин эппиэтинэс сүктэриллибитэ. Үүнэн иһэр эдэр киһини эппиэттээх үлэлэри салайыыга туруорбуттара. Сайынын үксүн отчуттар звеноларын баһылаан Амма киэҥ хочотугар үлүмнэһэн үлэлиирэ.
Тохсус пятилетка бастакы сайыныгар от хомууругар үрдэтиллибит эбэһээтэлистибэни ылыммыта. Ити дьылы кини толору механизированнай звенота хас биирдии киһиэхэ 123 туонна бастыҥ хаачыстыбалаах оту оттоон оройуон рекордун олохтообута. Оттон түмүктээһиннээх сыл сайыныгар аҕыс киһилээх толору механизированнай звено хас биирдии киһитигэр 133,4 туоннаҕа тиэрдэн барыта 10675 центнер 12,6 бырыһыанын биэрбиттэрэ. Биһиги оройуоммут усулуобуйатыгар итинник курдук көрдөрүүнү ситиһэргэ Иван Иванович дэгиттэр идэлээҕэ улаханнык көмөлөспүтэ. Тиэхэньикэ алдьаннаҕына көрөн турбат этэ. Кини тырахтарыыс, уус, сварщик буолан бэйэтэ оҥорон өрөмүөҥҥэ уһун бириэмэни сүтэрбэт буолара. Ол иһин тиэхэньикэ күүһүн муҥутуурдук туһанара.
Отделение салалтата ханна ыарахан баар буолар да, онно бастатан туран Иван Ивановиһы ыытара. Ыарахантан аккаастаммыта эбэтэр кыайтарбатын туһунан дакаастаһа сатаабыта диэн суоҕа. Хайаан да кини ону толорбута эбэтэр туораппыта эрэ баар буолара.
Иван Иванович нэһилиэк Сэбиэтин дьокутаатынан, Сэбиэт бүддьүөккэ, тыа хаһаайыстыбатын бастайааннай хамыыһыйатын бэрэссэдээтэлинэн исполкомнары, сиэссийэлэри бэлэмнээһиҥҥэ, наадалаах боппуруостары бириэмэтигэр көтөҕөн уопсай үлэ-хамнас барыытыгар улахан көмөнү оҥороро, бэйэтинэн тэрийсэн, нэһилиэккэ ыытыллар бары үлэлэргэ көхтөөхтүк кыттара.
Отделение оробуочайдара кинини профсойуус олохтоох кэмитиэтин бэрэссэдээтэлинэн талбыттара. Бэйэтэ быһаччы производствоҕа үлэлии сылдьар киһи итинник элбэх бириэмэни эрэйэр уопсастыбаннай сорудахтары барытын дьүөрэлээн толороругар эмиэ туһугар улахан дьоҕур наада этэ. Иван Иванович ону даҕаны хайдах эрэ улахан сүпсүгэ суох ыпсаран, олоххо киллэрэн, толорон испитэ эрэ баар буолара.
Үтүө суобастаах, үрдүк таһаарыылаах үлэтэ “Үлэҕэ килбиэнин иһин В.И. Ленин төрөөбүтэ 100 сыл туолуутун бэлиэтээн” мэтээлинэн бэлиэтэммитэ.
Үлэ үүннэрбит киһитин Иван Сергеевы оройуоннааҕы XXIV баартыйа кэмпириэнсийэ дэлэгээттэрэ биир санаанан уобаластааҕы баартыйа кэмпириэнсийэтигэр дэлэгээтинэн талан үрдүк итэҕэли биэрбиттэрэ. Мырыла олохтоохторо күн бүгүнүгэр диэри уолларынан астыналлар уонна киэн тутталлар.
Сэмэн Жендринскэй