Бэҕэһээ, ахсынньы 7 күнүгэр Хатас сэлиэнньэтин “Тускул” НАДь-гэр аан бастакытын “Дэгэрэҥ тэтимигэр уйдаран” ырыа-үҥкүү түһүлгэтин Христофор Максимов пуондата көҕүлээн ыыттылар. Ырыа-үҥкүү күрэҕэр бэйэлэрин холоно, күөн көрсө 210 ырыаһыт, үҥкүүһүт оҕо, улахан киһи муһуннулар. Күрэхтэһии оҕолор, ыччаттар уонна аҕам саастаах дьон диэн арахсан ыытылынна.
Дьүүллүүр сүбэ састаабыгар Христофор Максимов Пуондатын чилиэннэрэ Христофор Максимов улахан уола Иннокентий Максимов, Өксөкүлээх Өлөксөй аатынан Норуоттар доҕордоһууларын дьиэтин сүрүн исписэлииһэ, Пуонда чилиэнэ Саргылана Адамова, Пуонда эдэр чилиэнэ, Христофор Максимов 100 сыллаах өрөгөйдөөх ыһыаҕын Гран-при хаһаайына Василий Новоприезжай бааллара.
“Бэйэм баҕабынан үөрэ-көтө тиийэн биир дойдулааҕым түһүлгэтигэр кытынным. 1 степеннээх лауреат үрдүк аатын ыламмын “Пудов-продакшн” устуудьуйаҕа босхо килииби устарга, монтаһыгар сэртэпикээтинэн наҕараадаланным, күүскэ үөрдүм. Сахалыы ырыаны-тойугу, үҥкүүнү өрө тутуоҕун, дэгэрэҥ тэтимэ сүппэтигэр үлэлиэххэйиҥ-хамныаххайыҥ”, — диэн Иван Кандинскай аатынан “Айыллаан” култуура киинин исписэлииһэ Варвара Гаврильевна Орлова кэпсээтэ.
Сэмэн ЖЕНДРИНСКЭЙ