Чурапчыга улуустааҕы «Твой старт» ыччат бэстибээлэ буолла. Бу тэрээһин өрөспүүбүлүкэтээҕи «Муус устар» бэстибэл иитинэн ыытылынна. Бэлиэтээн эттэххэ, «Муус устар» улахан түһүлгэтэ 14 хайысханан үлэлээн, араас эйгэттэн өрөспүүбүлүкэ бастыҥ, эдэр эрчимнээх ыччатын түмүөҕэ.
Манна Чурапчы улууһуттан 50 ыччат кыттар. Ону туоһулуур путевкалары улуус баһылыга Степан Саргыдаев уонна улуус ыччатын кытта үлэлиир исписэлиис Александра Хомус үөрүүлээх быһыыга-майгыга туттардылар. Маны сэргэ бу күн презентацияламмыт Новгородов алпабыытынан суруллубут «Чурапчы ыччата» брендбук сыаналаах продукцияларын бэлэхтээтилэр.
— «Муус устар» бэстибээл сылтан сыл кыттааччыта элбээн иһэрэ үөрдэр. Быйыл 14 хайысхаттан 11-гэр чурапчылар баарбыт. Бу иннинээҕи сылларга үчүгэй көрдөрүүлэри ситиспиппит, быйыл ону куоһаран, ситиһиилээхтик кыттаргытыгар баҕарабын.
Ыччат — сайдыыны түстүүр күүс. Онон үрдүкү да, улуус да салалтатын өттүттэн суолталаах өйөбүллэр бааллар. Ол курдук, Чурапчыга аан бастакы Ыччат киинэ аһыллыбыта. Бу сотору кэминэн аныгы дизайыннаах, улахан, туспа эбийиэккэ көһүөҕэ. Онон үлэлииргэ, түмсэргэ өссө үчүгэй табыгастаах эйгэ тэриллэн, ыччаттар мустан, санааҕытын үллэстэн, дойдубут, өрөспүүбүлүкэбит, улууспут сайдыытыгар таһаарыылаахтык үлэлииргитигэр эрэнэбит», — диэн эдэр дьоҥҥо баҕа санаатын Степан Анатольевич эттэ
Салгыы Аси-Куо Ашеина салайааччылаах Чурапчы нэһилиэгин «Чолбон» үҥкүү бөлөҕө «Муус устар» бэстибээлгэ кытта барар саҥа «Үс кут» үҥкүүлэрин көрдөрөн, мустубут дьон сэҥээриитин ыллылар.
Бу күн Дьокуускайдааҕы аныгы үөрэхтээһин уонна инновация институтун киэҥ билиилээх исписэлиистэрэ, идэлэрин толору баһылаабыт Геннадий Охлопков, Варвара Васильева уонна Алексей Аржаков лидер буолуу хаачыстыбатын сайыннарыыга, уопсастыбаҕа тус санааны тиэрдиигэ, хамаанданан үлэлииргэ үөрэтэр маастар-кылааһы, трениннэри ыыттылар. Ол түмүгүнэн кинилэр көхтөөхтүк кыттыбыт, лидер хаачыстыбатын көрдөрбүт бастыҥ кыттааччылары бэлиэтээн туран, «Муус устар» бэстибээлгэ путевкалары туттардылар.
Ити курдук, улуус ыччата «Твой старт» бэстибээлгэ саҥа билиилэри ылан, саҥа билсиһиилэри олохтоон, истиҥник кэпсэтэн, үөрэн-көтөн дуоһуйа сынньаннылар.
«Муус устар» бэстибэлгэ кыттар Чурапчы дэлэгээссийэтигэр ситиһиилэри баҕарабыт.
Марфа Петрова.