Бэҕэһээ, Владивосток куоракка “Россия – страна возможностей” бэрэсидьиэн платформатын иитинэн “Это у нас семейное” куонкурус уокуруктааҕы финалга тахсыы иһин түһүмэҕэ түмүктэннэ. Манна Илин Уһук уокурук араас эригийиэннэриттэн 4853 дьиэ кэргэн о.э 28477 киһиттэн сайаапка киирбититтэн 360 хамаанда чилиэттэрэ кэлэннэр кытыннылар. Саха сириттэн барыта холбоон алта хамаанда тиийэн күрэхтэстэ.
Финалга тахсыы иһин күрэхтэһии үөрүүлээх арыллыыта ыам ыйын 11 күнүгэр Нуучча арыытыгар ыытылынна. Үөрүүлээх чааска күрэхтэһэр дьиэ кэргэттэри Бэрэсидьиэн академиятын ректора, “Россия – страна возможностей” АНО генеральнай дириэктэрэ Алексей Комиссаров,
кини солбуйааччыта Оксана Ачкасова уонна Владивосток куорат баһылыга Константин Шестаков эҕэрдэлээтилэр.
Куонкурус бастакы күнүгэр анал былаһааккаларынан айар-тутар, ыспартыыбынай уонна өйү тургутар сорудахтардаах тэрээһиннэр буоллулар. Манна дьүүллүүр сүбэ сүрүннээн, хамаандалар үөрүйэхтэрин, билиилэрин буолбакка, бэйэ икки ардыгар төһө өйдөһөллөрүн, сыһыаннарын кэтээн көрдүлэр. Бу эҥэр ыытыллар куонкурустартан уратыта диэн экспертэр бэйэлэринэн хамаандаларга көмөлөһөн, сүбэ-ама биэрэннэр, психологтары кытары бииргэ оҥорбут методическай ньымаларыгар үөрэттилэр.
Күрэхтэһээччилэр араас хабааннаах лекцияларга, маастар-кылаастарга, аһаҕас дискуссияларга, экскурсияларга, ыспартыыбынай оонньууларга о.д.а аралдьытар тэрээһиннэр кыттыныы ыланнар бэйэлэрин билиилэрин-көрүүлэрин хаҥаттылар. Үөһэ этиллибитин курдук барыта холбоон 360 киһи кытынна, саамай кыра кыттааччы 5 саастаах онтон саамай аҕам саастаах кыттааччы 89-һа – үс көлүөнэ дьиэ кэргэн.
Бэҕэһээ, ыам ыйын 12 күнүгэр тэрээһин үөрүүлээх сабыллыытыгар, бырааһынньыктааҕы кэнсиэрт кэмигэр кыайыылаахтар ааттарын иһитиннэрдилэр.
Финалга тахсыы иһин 18 дьиэ кэргэн илин-кэлин түһүстүлэр манна Хабаровскай, Забайкальскай, Приморскай кыраайдартан, Бурятия өрөспүүбүлүкэтиттэн, Амур, Сахалин уобаластарыттан, Камчаткаттан, Чукотскай автономнай уокуруктан, Маҕадаан уобалаһыттан, Еврейскай автономнай уобалаһыттан, Саха сириттэн кытыннылар.
Биһиги үөрүүбүтүгэр, Саха сирин билиһиннэрэ, Чурапчыбыт улууһуттан элбэх улуустааҕы, өрөспүүбүлүкэтээҕи, Бүтүн Арассыыйатааҕы күрэхтэр кыайыылаахтара, призердара, ыспартыыбынай дьиэ кэргэн Василий уонна Надежда Лукиннар оҕолорунаан Лилияналыын, Арчынныын, Айгыыналыын уонна эһэлэрэ Иван Попов тиийэннэр сөптөөх утарсыыны оҥороннор “Саамай түмсүүлээх дьиэ кэргэн” анал номинацияҕа тигистилэр.
Финалга Саха сирин чиэһин Мииринэй куораттан көмүскүөхтэрэ.
“Олус интэриэһинэй куонкурус буолан түмүктэннэ. Манна биһиги бэйэбит дьиэ кэргэммит төрүт үгэстэрин билиһиннэрдибит, маастар-кылаастары ыыттыбыт. Өссө биир улахан устуоруйа кэрчигэ биһиги дьиэ кэргэммит өйдөбүлүгэр букатыннаахтыы хатанна, биһиги манна кытта кэлэрбитигэр, биһиэхэ ыалдьыбыт бар дьоммутугар, салалтабытыгар өйөбүллэрин иһин дириҥник махтанабыт”, — диэн Лукиннар дьиэ кэргэн Аҕа баһылыктара Василий Васильевич санаатын эттэ.
Санатан эттэххэ, маннык хабааннаах куонкурустар бары бэдэрээлинэй уокуруктара буола тураллар. Ол курдук, Санкт-Петербурга, Красноярскайга, Екатеринбурга уонна Ростов-на-Дону куораттарга эмиэ үрдүк таһымнаахтык ыытылыннылар. Финалга дистанционнай түһүмэхтэр түмүктэринэн саамай элбэх бааллаах дьиэ кэргэн тахсар быраабы ылар. Онтон Бүтүн Арассыыйатааҕы “Это у нас семейное” куонкурус финала бэс ыйын 5-8 күннэригэр ыытыллара былааннанар. Муҥутуур кыайыылаахтар ааттарын Дьиэ кэргэн, таптал уонна бэриниилээх буолуу күнүгэр истиэхпит: манна 30 дьиэ кэргэн олорор дьиэлэрин тупсаралларыгар анаан 5 мөл.сууммалаах сэртэпикээттэри тутуохтара онтон 300 финалист дьиэ кэргэнинэн улахан айан сэртэрпикээттэрин бэлэх тутуохтара.
Сэмэн Жендринскэй