Бэлиэ тэрээһин Дойдуга Дьоруойдар күннэригэр туһаайылынна. Арассыыйа Дьоруойун күнүн дэкээдэтин чэрчитинэн “Дохсун” успуорт уора5айыгар анал байыаннай дьайыы кыттыылаахтарыгар уонна бойобуой дьайыы бэтэрээннэригэр анаан физкултуурунай-ыспартыыбынай күрэхтэһии ыытылынна.
Байыаннай дьайыы кыттыылаахтарын РФ сенатора Сахамин Афанасьев, АГИП салайааччыта Георгий Михайлов, о.д.а. эҕэрдэлээтилэр, наҕараадалары туттардылар.
“Ахсынньы 9 күнүгэр Арассыыйа Дьоруойун күнэ бэлиэтэнэр. Бу билиҥҥи кэмҥэ олус сөптөөх, суолталаах даата буолар. Дойдуларын чиэһин көмүскээбит, сырдык тыыннарын толук уурбут уолаттары ахтар-саныыр ытык иэспит. Кинилэргэ, кинилэр дьиэ кэргэттэригэр көмө тиһигин быспакка барыахтаах.
Дьоруой буолуу араастаах, ким эрэ Үлэ Дьоруойа буолар. Итинник туохтан да толлубакка үлэлиэххэ, хорсуннук Ийэ дойдугун көмүскүөххэ, дьоруой буолан төрөөбөттөр, дьоруой буола үүнэллэр.
Дьоруойдуу быһыы туһунан былырыын ыйыппыккыт буоллар мин сатаан эппиэттиэм суоҕа этэ. Билигин дьоруойдуу быһыы төрөөбүт дьиэттэн, оҕо эрдэхтэн саҕаланар дии саныыбын. Ийэҕин, дьиэ кэргэҥҥин көмүскүү, харыстыы саныырыҥ улам-улам улаатан, дойду көмүскэлигэр тиэрдэр. Дьоруой буолуу бу улахан эппиэтинэс, бастатан туран эдэр ыччакка холобур буолуу”, — диэтэ Арассыыйа Дьоруойа Родимир Максимов. Кинини кытары үөрүүлээх чяаска Арассыыйа Дьоруойдара Александр Колесов уонна Филипп Евсеев кыттыыны ыллылар.
Күрэхтэһии успуорт хас даҕаны көрүҥэр ыытылынна, ол курдук кыайыылаахтары оҕунан, буулдьанан ытыыга, хары баттаһыытыгар, ыараханы көтөҕүүгэ уонна остуол тенниһигэр быһаардылар.
Чурапчы улууһуттан “Аҕа дойдуну көмүскээччилэр” Бүтүн Арассыыйатааҕы пуонда Чурапчытааҕы салаатын координатора Сергей Атласов салайааччылаах алта бойобуой дьайыы бэтэрээннэрэ кыттыыны ыллылар.
Манна ордук бэлэмнээхтэрин Кытаанах нэһилиэгиттэн Альберт Собакин уонна Чакыртан Дмитрий Алексеев көрдөрдүлэр.
Ол курдук күүстээх састааптаах, бэйэлэрин холлоругар лаппа кыахтаах уолаттары кытары хары баттаһыытыгар, былырыыҥҥы күрэх ытыыга чөмпүйүөнэ Альберт Спиридонович кыһыл уонна үрүҥ көмүс мэтээллэри эрэллээхтик ылары ситистэ: “Быйыл ытыыбар тоҕо эрэ табыллыбатым ол оннугар хары баттаһыытыгар киирэммин уҥабар уонна хаҥаспар икки мэтээли ыллым. Маннык тэрээһиннэр ыытыллаллара хайаатар даҕаны наада, эһиил Чурапчы хамаандатын күүскэ бэлэмнээн киллэриэххэ наада эбит”.
Оттон остуол тенниһин курдук сымсаны, сылбырҕа буолууну эрэйэр оонньууга, Чакыр хорсун-хоодуот байыаһа Дмитрий Дмитриевич лаппа сыралаһан туран үрүҥ көмүс мэтээл хаһаайынынан буолла.
Уолаттар санаалара бөҕөх, инникитин даҕаны тиийэннэр өссө күүскэ күрэхтэһэр санаалаахтар.
Сэмэн ЖЕНДРИНСКЭЙ, Чурапчы улууһун бойобуой дьайыы бэтэрээннэрин Сэбиэтин бэрэссэдээтэлэ