Муус устар 12-19 күннэригэр Москва уобалаһын Раменскай куоракка олорон эрэ волейболга (ПОДАҕа) Арассыыйа Кубогар күрэхтэһии буолла. Саха Сириттэн 3 хамаанда кытынна: Эр дьоҥҥо өрөспүүбүлүкэ сүүмэрдэммит хамаандата, дьахталларга «Сахава», «Манчаары».
Маныаха сүүмэрдэммит састаапка киирэн, биһиги улууспутуттан Стас Никитин, Игорь Афанасьев, Аня Заровняева өрөспүүбүлүкэ чиэһин көмүскээтилэр.
Хатыһыылаах киирсии түмүгүнэн эр дьоҥҥо уопсайа 13 хамаандаттан Саха Сирин хамаандата Ill-с миэстэҕэ тиксэн, боруонса призер үрдүк ааты ылла.Бу күрэххэ ЧГФКСИ устудьуона, волейболга улуустааҕы сүүмэрдэммит хамаанда чилиэнэ Игорь Афанасьев бастакы сүрэхтэниитэ буолар.
Дьахталларга «Манчаары» хамаанда ll-с миэстэ, «СахаВа» V-с миэстэ буоллулар. Онуоха Аня Заровняева «СахаВаттан» кытынна. Бу улахан таһымнаах күрэхтэһии быйыл күһүн буолуохтаах Арассыыйа чемпионатыгар бэлэмнэнии быһыытынан ыытылынна. Улууспут ыччаттара Арассыыйа таһымыгар кыттан, өрөспүүбүлүкэ састаабыгар киирэн, өссө улахан үрдэллэри дабайан истиннэр.
Спортсменнарбыт соҕуруу баран күрэхтэһэллэригэр үбүнэн көмөлөспүт улуустааҕы спорт управлениетыгар( сал.Егоров Дь.В), ЧГФКСИ-гар (ректор Готовцев И.И) адаптивнай спорт федерациятын ааттыттан махталбытын тиэрдэбит.
Иннокентий Матвеев