Бүгүн, ахсынньы 22 күнүгэр, Чурапчытааҕы полиция отделыгар 16 миэстэлээх аныгы конструкциялаах сабыс-саҥа, киэҥ-куоҥ, сырдык, сылаас гараас үлэҕэ киирдэ. Тэрээһиҥҥэ Чурапчы улууһун баһылыгын 1-кы солбуйааччы Егор Сивцев, Чурапчы нэһилиэгин баһылыга Владимир Сивцев кыттыыны ыллылар.
Улууска дьон-сэргэ олоҕо нус-хас буолуутугар түүннэри-күннэри үлэлиир дьоһун сотрудниктардаах дьоҕус кэлэктиип өр сыллаах туруорсуулара олоххо киирэн, аныгы үйэҕэ эппиэттиир толору хааччылыылаар гараас тутуллан, полиция үлэһиттэрин үөрүүлэрэ үгүс. Алгыс сиэрин-туомун Валерий Герасимов ыытта.
Егор Сивцев отдел үлэһиттэрин бэлиэ күнүнэн эҕэрдэлээн туран, бука барыларыгар кытаанах доруобуйаны, үлэҕэ-хамнаска ситиһиини баҕарда. Владимир Дмитриевич, быйыл Чурапчы 375 сыллаах үбүлүөйүнэй тэрээһиннэригэр, ис дьыала уорганына сотрудниктарын көмөлөрүнэн бэрээдэк туох даҕаны кэһиллиитэ суох ааспытын бэлиэтээтэ, киэҥ, саҥа уораҕай өссө да өр сылларга сулууспалыырыгар баҕа санаатын эттэ. Эҕэрдэлэргэ “Система противопожарной безопасности 01” ХЭТ генеральнай дириэктэрэ Егор Анемподистов, Чурапчы улууһун Ис дьыала министиэристибэтин бэтэрээннэрин Сэбиэтин бэрэссэдээтэлэ, полиция майора Дмитрий Евграфов кыттыстылар.
“Биһиги отделбыт бу күннэргэ диэри гарааһа суох үлэлээн кэллэ. Сахабыт сирин тыйыс тымныытынан биллэр, онуоха тиэхэньикэбит сүүрэригэр улахан харгыстары үөскэтэр, үлэлииргэ биллэн туран сүрдээх ыарахан буолар. Бастатан туран улахан махталбытын бэйэбит министиэристибэбитигэр, чуолаан миниистирбитигэр Владимир Николаевич Прокопенкоҕа тириэрдэбит, кини бу биһиги кыһалҕабытын үрдүттэн өйөөн, үөһэттэн үп-харчы көрөн гарааспыт тутулунна. Онуоха бу биһиэхэ улууспут уонна нэһилиэкпит дьаһалталара утары бараннар, биһигини өйдөөбүттэригэр, өйөөбүттэригэр бэйэм кэлэктиибим аатыттан улаханнык махтанабыт. Кинилэри сэргэ, бу кылгас кэм иһигэр бэдэрээччикпит Егор Егорович сырдык, ыраас, киэҥ-куоҥ гарааһы хаачыстыбалаахтык туппутугар дириҥник махтанабыт. Бачча үчүгэй дьиэҕэ-уокка саҥаттан-саҥа тиэхэньикэлэр кэлэ турдуннар, ол туһугар кэккэ үлэлэри ыытыахпыт. Бу гарааспыт уһун үйэлээх буоллун, сылаас, сырдык буоллун, элбэх туһаны аҕаллын”, — диэн Чурапчытааҕы полиция отделын начаалынньыга, полиция подполковнига Иннокентий Свинобоев эттэ.
Манна даҕатан эттэххэ, илин эҥэр улуустарга маннык хабааннаах гараас Таатта улууһугар тутуллубута биллэр. Ол эрэн уопсай иэнинэн Чурапчы улууһун отделын саҥа уораҕайа быдан улаханынан билиннэ.
Сэмэн Жендринскэй. Ааптар хаартыскаҕа түһэриитэ