Бүгүн Александр Федотов аатынан успуорт уораҕайыгар оскуола үөрэнээччилэрэ төрөппүттэрин кытары эбии ыспартыыбынай дьарыкка суруттар тоҕоостоох күннэрэ үүннэ.
“Бу сыллар усталарыгар уопсай үлэҕэ элбэх ситиһиилээхпит, үгүс көлүөнэ ыччат үөрэнэн, эт-хаан, өй-санаа өттүнэн сайдан таҕыстылар. Оскуолаҕа дьарыктаммыт оҕолор Арассыыйа, Уһук Илин уонна Сибиир, өрөспүүбүлүкэ араас таһымнаах күрэхтэһиилэрин кыайыылаахтарынан буоллулар. Үгүс оҕолор бэйэлэрин олохторугар, успуорка үрдүкү ситиһиигэ тиийбэтэх да буоллахтарына, олоххо сыаллаах, ситиһиилээх буола үөрэнэн, сайдан, олох киэҥ аартыгар үктэннилэр. Бүгүҥҥү күҥҥэ улуустааҕы оҕо ыспартыыбынай оскуолатыгар 42 үлэһит, онтон 21 тириэньэр-учуутал үлэлиир. Улууспут дьаһалтатын, үөрэх салалтатын өйөбүллэринэн 7 нэһилиэккэ 11 успуорт көрүҥэр – көҥүл тустууга, боксаҕа, волейболга, теннискэ, буулдьанан ытыыга, сүүрүүгэ, хотугу многоборьеҕа, гиирэҕэ, мас тардыһыытыгар, атах оонньуутугар, аэробикаҕа уопсайа 720 оҕо хабыллан сылдьар, саҥалыы ирдэбилинэн былааннаах үлэ тэтимнээхтик ыытыллар”, — диэн СӨ физическэй култуураҕа уонна успуорка туйгуна, оҕону-ыччаты успуорка эбии үөрэхтээһин оскуолатын дириэктэрэ Александр Неустроев кэпсиир.
Алтана Эверстова, Семен Новгородов аатынан Чурапчы орто оскуолатын 8-с кылааһын үөрэнээччитэ: “Икки хонуктааҕыта сүүрүү куруһуогар суруттарбытым, бастакы дьарыгым олус үчүгэйдик ааспыта. Бүгүн иккис күммүт эрчиллэ кэллим. Эрдэ волейбол көрүҥэр дьарыктаммытым. Ыспартыыбынай саалабыт олус үчүгэй, сүрүн итэҕэһэ диэн иһэр уу суоҕа куһаҕан. Мин кылааспыттан хас даҕаны оҕо эрчиллэр”.
Наталья Захарова, элбэх оҕолоох ийэ, Чурапчы нэһилиэгин олохтооҕо: “Икки оҕом Чурапчы орто оскуолатыгар үөрэнэллэр, кыыһым үһүс кылааска үөрэнэр, уолум бастакы кылааска киирдэ. Уолум бэйэтин баҕатынан остуол тениһигэр уонна бокса куруһуогар суруттарда. Оҕону успуорт өттүгэр хайаан даҕаны уһуйуохха наада, эбии дьарык баара олус үчүгэй. Билигин гаджет үйэтэ үүннэ, онуоха эт-хаан өттүнэн дьарыктыы сатыахтаапыт”.
Семен Артемьев, оҕону-ыччаты успуорка эбии үөрэхтээһин оскуолатын дириэктэрин ыспартыыбынай-маассабай үлэҕэ солбуйааччы: “Быйылгы хомуурбут саҕаланна. ДЮСШ балаҕан ыйын 1 күнүттэн арыллан үлэлии турар. Бүгүҥҥү күҥҥэ 11 секция үлэлиир. Былырыын 678 оҕо дьарыктаммыта, быйыл 700-тэн таһаараары былаанныыбыт. Манна Чурапчы орто оскуолатын барытын хаба сатыахтаахпыт, ону таһынан гимназияттан уонна Иван Павлов аатынан орто оскуола үөрэнээччилэрэ эбии кэлэннэр дьарыктаналлар. Тириэньэрдэр бары көрүҥҥэ барытыгар бааллар, усулуобуйаны төһө кыалларынан хааччыйа сатыыбыт, ыспартыыбынай саала мэлдьи аһаҕас, расписание кэмигэр оҥоһуллубута. Дьарык барыта төлөбүрэ суох, улуус иһинээҕи буолан босхо ыытыллар. Убаастыллаах төрөппүттэн онон оҕолоргутун успуорка угуйуҥ, инники сайдыыларыгар олукта ууруҥ. Былырыын саас, ДЮСШ иһинэн ГТО киинин арыммыппыт, инньэ гынан алтынньы ыйтан саҕалаан оҕолорго күһүҥҥү ГТО-ры ыытаары бэлэмнэнэ сылдьабыт”.
Сэмэн Жендринскэй