Чурапчылар кутурҕан уонна кэриэстэбил күнүгэр муһуннулар

Бу күн, 83 сыл анараа өттүгэр, бэс ыйын 22 күнүгэр фашисткай Германия Сэбиэскэй Сойууска соһуччу саба түһэн Аҕа дойду Улуу сэриитэ саҕаламмыта.Чурапчы улууһуттан сэриигэ 2170 киһи ыҥырыллыбыта. Мантан 975 буойун сэрии уоттаах толоонуттан дойдуларыгар эргиллибэтэхтэрэ.

Чурапчы дьоно-сэргэтэ бу күнү кэриэстээн, Кыайыы скверигэр Аҕа дойдуну көмүскээбит буойуттарбытыгар сибэкки дьөрбөтүн уурдулар.

Улуус баһылыга Степан Саргыдаев, Чурапчы нэһилиэгин баһылыга Владимир Сивцев, улуус ыччатын сэбиэтин бэрэссэдээтэлэ Диана Павлова, ССРС уонна Российскай Федерация бочуоттаах донора, Чурапчы улууһун уонна нэһилиэгин бочуоттаах олохтооҕо Спартак Слепцов биир дойдулаахтарбытын ахтан-санаан аастылар. Маннык алдьархай аны хаһан да хатыламматыгар баҕардылар.

«Бэс ыйын 22 чыыһылата — биһиги норуокка кутурҕан күн. Бу күн Аҕа дойду Улуу сэриитэ саҕаламмыта. Манна биһиги норуоппут олус хорсуннук турунан, уопсайа 1418 суукка устата, дойдуларын босхолуур сыаллаах, сэриилэһэн кыайыыны уһансыбыттара. Бу кыргыһыыга биһиги Чурапчыбыт дьоно-сэргэтэ чиэстээхтик, хорсуннук иллээх-эйэлээх олох туһугар сырдык тыыннарын толук уурбуттара. Кинилэр үтүө ааттара куруутун биһиги өйбүтүгэр-сүрэхпитигэр сөҥөн сылдьыа. Суох буоллун сэрии, суох буоллун өлүү, туругурдун эйэ!», — диэн Чурапчы улууһун баһылыга Степан Саргыдаев эттэ.

Людмила Горохова, ааптар хаартыскаҕа түһэриитэ.