Бүгүн Чурапчы уопсастыбаннаһа, актыбыыстара уопсайа 150-ча киһи сыбаалка эргин ыһыллыбыт бөҕө-саҕы хомуйдулар.
Чурапчы нэһилиэгин баһылыга Владимир Сивцев этэринэн, субуотунньукка Чурапчы улууһун, нэһилиэгин дьаһалталарын үлэһиттэрэ, улуус дьокутааттара, «Хатан» ХЭТ, «Айыллаан» киинэ тыйаатырын, А.К. Софронов аатынан спорт киинин уонна «Утум» Айыы кыһатын дьиэтин кэлэктииптэрэ, нэһилиэк уопсастыбаннай түмсүүлэрэ кытыннылар.
Субуотунньук cэттэ ый иһигэр улууска ыытыллар ырааһырдыы үлэлэрин чэрчитинэн тэрилиннэ. Бу үтүө дьыалаҕа кыттыһан, тэрилтэ кэлэктииптэрэ, түөлбэ олохтоохторо көхтөөхтүк түмсэн, бэйэлэрэ талбыт территорияларыгар субуотунньуктаатылар.
Санатан эттэххэ, быйыл Чурапчы нэһилиэгэр Чөл олох сыла биллэриллибитэ. Онон сибээстээн араас хабааннаах үлэлэр тиһигин быспакка ыытыллаллар.
Марфа Петрова.