Балаҕан ыйын 21 күнүгэр «Айылгы» норуот айымньытын дьиэтигэр Чурапчытааҕы колледж иһинэн үлэлиир В.А.Вонгородскай аатынан мэдиссиинэ колледжын салаатын 1кы кууруһун устудьуоннара муһуннулар. Устудьуон буолбуттарын туоһулуур докумуоннарын туттарыыга эҕэрдэ тылларын улуус дьаһалтата, киин балыыһа, Чурапчытааҕы колледж,Дьокуускайдааҕы мэдиссиинэ колледжын салалталара эттилэр.
Мэдиссиинэ колледжын дириэктэрэ Дмитрий Алексеев ордук чорботон улууспут баһылыгар Степан Саргыдаевка махтанна: «Эһиги улуускут дьаһалтата, киин балыыһаҕыт салалтата туруорсаннар ааспыт үөрэх сылыгар мэдиссиинэ колледжын салаата манна үлэтин саҕалаабыта. Онон эһиги дьиэҕититтэн тэйбэккэ миэстэтигэр үөрэнэр кыахтанныгыт. Быйыл атын улуустартан эмиэ кэлэн туттарсан киирбиттэрэ да элбэҕи этэр. Чугас дьоҥҥут, улуускут эрэлин түһэн биэрбэккэ ситиһиилээхтик үөрэниҥ»,-диэтэ.
Бу үөрүүлээх, долгутуулаах күн устудьуоннар эҕэрдэ нүөмэрдэрин астына көрдүбүт,ылбаҕай ырыа ылланна, аламаҕай алгыс тыл ананна.
Наталья Сибирякова
