Чурапчы улууһун дьаһалтатын успуорка управлениета сэтинньи 8 күнүгэр успуорт бэтэрээннэрин сыл аайы эҕэрдэлиир үтүө үгэстээх.
Улуустааҕы успуорт управлениетын начаалынньыга Дьулустан Егоров, успуорка өр сыллар усталарыгар үгүс көлөһүнүн тохпут, билигин 74-с хаарыгар үктэммит, остуол тенниһигэр, волейболга Чурапчылар ааттарын киин түһүлгэлэргэ киэҥник ааттаппыт, үс сылы быһа муора, акыйаан кытылыгар дохсуннук сулууспалаабыт моряк, Чурапчы улууһун Бочуоттаах олохтооҕо, потребкооперация туйгуна, уон оҕо амарах аҕата, Чурапчы улууһун успуорт бэтэрээннэрин Сэбиэтин бэрэссэдээтэлэ Герасим Степанович Платонов дьиэлэригэр-уоттарыгар тиийэн махтал суругу өйдөбүнньүк бэлэх туттарда. Хойуу Үүттээх чэй иһэ-иһэ истиҥник-иһирэхтик, ирэ-хоро кэпсэттилэр.
Улуус успуордун салайаччылара успуорт эйгэтигэр бүгүн буола турар быһыыны-майгыны, бастыҥ ыспарсымыаннарбыт ситиһиилэрин кэпсээтэ, ыйытыыларга хорйдаатылар. Холобур, нэһилиэнньэ бары араҥатыгар ГТО нуормаларын туттарыылар көхтөөхтүк ыытыллалларын, Хатылыттан Изот Кривошапкин остуол тенниһигэр Москуба куоракка утумнаахтык дьарыктанарын, кэскиллээх ыччаттар баалларын, бастыҥ ыспарсымыаннарбыт олимпийскай мэтээллэри аҕалалларын туһугар күүстээх үлэ барарын, бэйэбит да, кэлии да тириэньэрдэр айымньылаахтык үлэлииллэрин, анал байыаннай дьайыыга ыспарсымыаннар сылдьалларын, сааҥсыйаларынан сибээстээн олимпийскай бырагыраамалар быстах кэмҥэ тохтотуллубуттарын, быйыл физкультурнай хамсааһын 100 сыла үтүө түмүктэрдээх буолан эрэрин, итиэннэ Дойду бэрэсидьиэнэ Владимир Путин эһиилги үүнэр дьылы – Успуорт сылынан биллэрбитин уо.д.а. кэпсээн иһитиннэрдэ.
Герасим Степанович өйө-санаата чэбдик, успуорт эйгэтигэр буола турар быһыыны-майгыны билэ-көрө, сэҥээрэ олорор тумус туттар киһибит. Успуорт бэтэрээннэрэ санааларын этэллэрэ, этиилэри киллэрэллэрэ үөрдэр. Саха сиригэр физическэй култуура уонна успуорт сайдыыларыгар кылааттарын киллэрбит, билигин сааһыран олорор бэтэрээннэргэ махтал буоллун! Сирдээҕи олохтон дьолу толору билиҥ, чэгиэн-чэбдик буолуҥ, ытыктабыллаах бэтэрээннэрбит!
Сэмэн Жендринскэй