Ааспыт сырыыга, улуус баһылыгын отчуотугар, нэһилиэнньэ улахан аҥарын долгутар сүрүн боппуруоһунан Таас балыыһабыт иккис уочараттаах тутуутун хаамыыта этэ. Чурапчы улууһун Прокопий Сокольников аатынан киин балыыһа кылаабынай бырааһа, хируруг Николай Сергеевич Сивцев иһитиннэрбитинэн, билигин Таас балыыһаҕа климатическай тэриллэри таҥыы үлэтэ күүскэ ыытыллар.
Итини таһынан Новосибирскай куораттан саҥа ааннары аҕалан туруораллар, сантехника таҥыллар, ону таһынан түүннэри-күннэри кырааска, сууйуу-сотуу үлэлэрэ ыытыллаллар. Сотору кэминэн мэдиссиинискэй миэбэллэри, тэриллэри таҥан саҕалыахтара. Ааспыт сырыыга СӨ Бырабыыталыстыба бэрэссэдээтэлин солбуйааччы Георгий Степанов кэлэ сылдьан “тутуу үлэтин кулун тутар ыйыгар түмүктээҥ” диэн сорудахтаабыта.
Саҥа эбийиэккэ биир симиэнэҕэ быһа барыллаан 100 киһи сылдьар кыахтаныаҕа, поликлиникаҕа терапия отделениета, дьахтар уонна оҕо консультацията, күнүскү сытар куойка (3), стоматология уонна доруобуйаны чөлүгэр түһэрэр отделениелар баар буолуохтара диэн иһитиннэрэллэр. Хаһаайыстыбаннай салааҕа мэдиссиинэ суһал көмөтүн отделениета (гараастаах уонна ыскылааттаах) киириэҕэ. Мэдиссиинэ саҥа уораҕайа аныгы көрдөрүүгэ толору эппиэттиир үрдүк технологиялаах оборудованиенан хааччылынна. Чурапчы улууһун эмчиттэрэ саҥа тиэхиньикэлэр көмөлөрүнэн ыарыыны тута быһаарар уонна үрдүттэн эмтиир саҥаттан-саҥа ньымалары баһылыыр былааннаахтар.
Санатан эттэххэ, саҥа комплекс Дойду баһылыга Владимир Путин көҕүлээбит “Доруобуйа харыстабыла” национальнай бырайыак чэрчитинэн, “Доруобуйа харыстабылын бастакы сүһүөх звенотун саҥардыы” эрэгийиэннээҕи бырагырааманан тутуллар.
Сэмэн Жендринскэй