Хас биирдии кылаас салайааччыта оҕо баҕатын, дьоҕурун таба көрөн, санаатын сааһылаан, алмаас таас курдук кырыылаан, чочуйан, дьоһуннаах киһи иитэн таһаарар биир тутаах соруктаах уһуйааччынан буолар.
Кини ураты болҕомтото, сүбэтэ-амата, иитэр үлэтэ, кыһамньыта, оҕоҕо истиҥ сыһыана – үөрэнээччилэрин үрдүккэ кынаттыыр, олоҕу сыаналыырга, тулалыыр эйгэни, Ийэ дойдуну таптыырга үөрэтэр, сиэрдээх киһи буола улаатан олоххо бэйэ миэстэтин буларга сирдиир.
Бүгүн, Улуу тириэньэр Дмитрий Коркин аатынан Чурапчытааҕы республиканскай олимпийскэй эрэллэри бэлэмниир интэринээт-оскуолатыгар “Сүрэхпин оҕолорго аныыбын” улуустааҕы кылаас салайааччыларын күрэҕин үөрүүлээх арыллыыта буолла. Сылын аайы ыытыллар күрэх сүрүн сыалынан-соругунан, төһө кыалларынан кылаас салайааччытын үлэтин киэҥ араҥаҕа билиһиннэрии, биллэн туран уопут атастаһыыта, салгыы сайдарга, үүнэргэ аналлаах эйгэни тэрийии буолар. Үгэс курдук күрэххэ барыта 11 кылаас салайааччыта сайаапка биэрдэ: Уот Субуруускай аатынан Болтоҥо орто оскуолатыттан Нюргуяна Слепцова, Иван Федосеев-Доосо аатынан Дириҥнээҕи агрооскуолаттан Майя Петрова, Василий Яковлев-Далан аатынан Кытаанах орто оскуолатыттан Анисия Дьяконова, Афанасий Макаров аатынан Улахан күөл ситэтэ суох орто оскуолатыттан Светлана Платонова, Семен Флегонтов аатынан Хадаар орто оскуолатыттан Галина Бандерова, Василий Соловьев-Болот Боотур аатынан Хатылы орто оскуолатыттан Елена Иванова, Степан Макаров аатынан Чурапчы гимназиятыттан Иван Пономарев, Георгий Башарин аатынан Сылаҥ орто оскуолатыттан Нюргуяна Сивцева, Афанасий Илларионов аатынан Хайахсыт орто оскуолатыттан Мотрена Андреева, Семен Новгородов аатынан Чурапчы орто оскуолатыттан Николай Захаров, Дмитрий Коркин аатынан интэринээт-оскуолаттан Ньургуяна Седалищева.
Кыайыылаахтар ааттара бу киэһэ 18 чаас саҕана биллиэҕэ. Дьүүллүүр сүбэҕэ, Чурапчы улууһун үөрэҕин начаалынньыгын солбуйааччы э.т. Ираида Винокурова, үөрэх салаатын иитэр үлэҕэ отделын салайааччыта Евгения Чичигинарова, үөрэх салаатын иитэр уонна эбии үөрэхтээһин отделын сүрүннүүр исписэлииһэ Екатерина Хоютанова, үөрэх салаатын психологическай-педагогическай хайысхаҕа кылаабынай исписэлииһэ Лена Винокурова уонна Степан Макаров аатынан Чурапчы гимназиятын 9 “а” кылааһын үөрэнээччитэ Богдан Логинов үлэлииллэр.
Кыттааччылар эрдэттэн, кэтэхтэн түһүмэххэ бэйэлэри билиһиннэрэн, “Разговоры о важном” уруоктарын онлайн-форматынан ыыппыт буоланнар билигин бэйэлэрин таһымнарын көрдөрөр маастар-кылаастары ыытан саҕалаатылар. Биир бастакынан, сэрэбиэйэ ол оннук таайан Степан Макаров аатынан Чурапчы гимназиятын устуоруйаҕа учуутала, кылаас салайааччыта Иван Терентьевич Пономарев дьарыгын саҕалаата.
Нюргуяна Слепцова, Уот Субуруускай аатынан Болтоҥо орто оскуолатын изо уонна технология учуутала, 7-с кылаас үөрэнээччилэрин салайааччыта: “Бэйэм кылаас салайааччытын быһыытынан 14-с сылбын үлэлиибин, икки кылаас выпустаахпын. Маннык куонкуруска аан бастакыбын кыттабын. Бастатан туран оҕолору кытары тапсан, кинилэри өйдөөн биир долгуҥҥа сылдьыахха наада. Кылааспар биэс кыыс оҕолоохпун, ситиһиилэрбит кыралаан да буоллар бааллар. Түгэнинэн туһанан хамыыһыйабар: Мария Николаевнаҕа, Валентина Андреевнаҕа, Айыллаана Петровнаҕа, Күннэй Петровнаҕа күүс-көмө, өйөбүл буолбуттарынан улаханнык махтанабын”.
Николай Захаров, Семен Новгородов аатынан Чурапчы орто оскуолатын физкултуураҕа учуутала: “Маҥнай 5-7 кылаастарга ыспартыыбынай диэн этибит онтон 8-с кылааска салааларынан арахсан техническай кылаас буоллубут, төрдүс сылбын салайан илдьэ сылдьабын. Маннык куонкурус тэриллэн ыытыллара хайаан даҕаны наада. Ордук эдэр кылаас салайааччыларыгар туһалаах диэн саныыбын, дьону көрөн-истэн уопут хомунабыт. Кылаас салайааччыта диэн оҕоҕо иккис төрөппүт кэриэтэ,кылааһы кэлэктиип оҥорууга барыта иитии үлэтэ. Үөрэнээччилэри барыларын биир тэҥник тутуохха наада”.
Сэмэн Жендринскэй. Ааптар хаартыскаҕа түһэриитэ